هێزێن سووریەیا دەمۆکراتیک هه‌سه‌ده بداویبوونا ئۆپەراسیۆنێن ل دژی داعشێ یێن ل زیندانا حەسەکێ و دەردۆرا وێ راگه‌هاند.
ناڤەندا راگه‌هاندنا ههسهدێ د داخویانیەکێ دا راگه‌هاند، «د چارچۆڤەیا هه‌وا پاقژکرنا بەرفرەها هێزێن مە یێن ل دژی چەتەیێن داعشێ دا، ئەم بداویبوونا ئۆپه‌راسیۆنا پاقژکرنا زیندانا سیناعه یا حەسەکێ رادگه‌هینن».
زیندانا سیناعه یا حەسەکێ کو نێزیکی 5 هەزار ئەندامێن داعشێ تێدا بوون، شەڤا 20ێ ڤێ مه‌هێ ژ ئالیێ داعشێ ڤە راستی هێرشه‌كا مەزن هات و د ئەنجامێ زیندان کەته د بن کۆنترۆلا چەکدارێن کو تێدا یاخیبوون راگه‌هانی.
ههسهدێ رۆژا 26ێ ڤێ مەهێ راگه‌هاند، زیندانا سیناعه ب تەمامی هات کۆنترۆلکرن و پرانییا چەکداران خوە رادەستی هێزێن وان کرن، لێ دیار کر کو هێژا 60 – 90 چەکدارێن داعشێ د زیندانێ دا ماینە و خوە رادەست نەکرینە.
د وێ دەربارێ دا، رۆژنامەیا ئامەریکی «نیۆیۆرك تایمز» ژ سەر زارێ رایەدارەکی ئه‌مەریکی راگه‌هاند، «نێزیکی 200 گرتیێن داعشێ ژ زیندانا سیناعه رەڤیانە».
هەر د ڤێ دەربارێ دا، رەوانگەها سووری یا مافێن مرۆڤان بەلاڤ کر، پشتی کۆنتۆلکرنا زیندانا حەسەکێ ژ ئالیێ ههسهدێ ڤە، تەرمێن 19 ئەندامێن هێزێن ئاسایش و شەرڤانێن ههسهدێ د ناڤا زیندانێ دا هاتن دیتن.
رەوانگەهێ دیار کر ژی، د هەمان جهی دا تەرمێن 22 چەکدارێن داعشێ هاتن دیتن.
ب ڤی ئاوایی هەژمارا کوشتیێن بوویەرێن زیندانا حەسەکێ گه‌هشت 373 کەسان، ژ وان 98 کوشتییێن ئاسایش و ههسهدێ و 268یێن داعشێ نە.
