گرتن و رەڤاندنا رۆژنامەڤان، چالاکڤان، ئەندام و لایەنگرێن پارتیێن نە لگەل پەکەکێ دا ل رۆژئاڤایێ کوردستانێ هەر کو دچیت زیدەتر دبیت و د ڤێ چارچۆڤێ دا دو کەسێن دی هاتن رەڤاندن.
ل گۆری ئاگاھی و زانیاریان ھەر یەک ژ سەبری فەخری ئەندامێ کۆمیتا ھەرێمی یا پەدەکە-سێ و باوەر مەلا ئەحمەد نووچەگەھانێ یەکیتی میدیا دوهی درنگیا شەڤێ و ب شێوەیەکی دوور ژ رەوشت و رەفتاران، ژ لایێ میلیشیایێن پەیەدێ ڤە هاتنە رەڤاندن و تا نھا نایێ زانین ئەو ب کو دا برنە.
ئەڤ یەک د دەمەکێ دا یە کو میلیشیایێن پەیەدێ د مەھا بووری دا، د 9ێ مەھا چلەیێ دا عەبدولرەحیم تەمێ، ئەندامێ ئەنجوومەنا خوەجھی یا سەرێ کانیێ یا ئەنەکەسێ و ئەندامێ نڤیسگەھا پەیوەندیێن گشتی یا شەپێلا پێشەرۆژا کوردی ل سووریێ ل دربێسیێ رەڤاند و زارۆک، ھەڤژین و برایێ وی کو خوەدان پێدڤیێن تایبەتن ل کۆلانان ل بەر سەرمایێ ھشتن، تا نھا چارەنڤیسا وی ژی نە دیارە.
د 18ێ مەھا چلەیێ دا ھەمان میلیشیایان رۆژنامەڤان ژیندار بەرەکات یێ نووچەگەھانێ یەکیتی میدیایێ، ژ جھێ کارێ وی ل حەسەکێ رەڤاند.
ھەر د ھەمان دەمێ دا ئەنەس سەید حەمێ کو ئەندامەکی پارتیا یەکیتیا دەمۆکراتی کوردستانێ یە ژ تاخا سالحیێ رەڤاند ب ھەمان شێوەیی ھاتە لێدان و ئیشکەنجەکرن و گوژمەک پارە ب بوھایێ 300 دۆلاران و 75 ھەزار ژێ دزین پشترا سەربەست بەردا.
