شانەیا راگھاندن و ھشیارییا نشتمانی یا ل وەزارەتا پێشمەرگە ب داخویانیەکێ راگھاند؛ قۆناغا یەکەما ئۆپەراسیۆنا ھەڤبەشا ناڤبەرا ھێزێن پێشمەرگە و ئارتێشا ئیراقێ دا ل میحوەرێن 5 و 6، ب ئاوایەکێ سەرکەفتی ب داوی بوویە.
د داخویانیێ دا ھات راگھاندن: “پشتی رێزەجڤینێن ھەڤبەشێن ناڤبەرا فەرماندارێن سەربازی یێن ھێزێن پێشمەرگە و ئارتێشا ئیراقێ، ژ بۆ نەھشتنا ڤالاھیا ئەولەھیێ، رۆژا 7ێ شوباتا 2022یێ، ئۆپەراسیۆنا ھەڤبەشا ھێزێن پێشمەرگە و ئارتێشا ئیراقێ ل سنۆرێ ناحیا سەرگەران و باکور و رۆژھلاتێ چیایێ قەرەچووخێ برێڤە چوو.”
ھات دیارکرن: “ژ ھێزێن پێشمەرگە میحوەرێن 5 و 6 و لیوایێن پیادە یێن 2، 10، 14، 18، کۆماندۆ لگەل ھەردو یەکەیێن تایبەتێن میحوەرێن 5 و 6، ژ ھێزێن ئارتێشا ئیراقێ ژی فەرمانداریا ئۆپەراسیۆنێن نەینەوا و فەرمانداریا ئۆپەراسیۆنێن کەرکووکێ (بارەگەھا پێشکەتی) بەشدار بوون.”
ھەروەھا ھات ئاشکەراکرن: “ئارمانجا ڤێ ئۆپەراسیۆنێ، کۆنترۆلکرنا دەڤەرێن ڤالاھیا ئەولەھیێ بوو، کو دکەڤنە سنۆرێ ناحیا سەرگەران و پەلکانە و باکور و رۆژھلاتێ چیایێ قەرەچووخێ.”
شانەیا راگھاندن و ھشیاریێیا نیشتیمانی دیار کر: “د ڤێ ئۆپەراسیۆنا ھەڤبەش دا، دەڤەرا دیارکری یا ئۆپەراسیۆنێ ب تەمامی ھات کۆنترۆلکرن و ھەردو ئالیان، ھێزێن پێشمەرگە و ئارتێشا ئیراقێ د خالا گەھشتنە ھەڤ دا، سەرکەفتنا ئۆپەراسیۆنا خوە راگھاند.”
