چەکدارێن داعشێ ل کەمپا ھۆلێ ئێرشی زێرەڤانێن کامپێ کر

چەکدارێن داعشێ ل ناڤ کامپا ھۆلێ یا ل پارێزگەھا حەسەکێ یا رۆژئاڤایێ کوردستانێ دا ئێریشی زێرەڤانێن کامپێ کر و د ئەنجاما ئێریشێ دا کوشتی و بریندار ھەنە.

رەوانگەھا سووری بۆ مافێن مرۆڤان راگھاند؛ چەکدارێن داعشێ ھەول دان دو زێرەڤانێن کەمپێ برەڤینن و پشترا شەر د ناڤبەرا وان دا روودا و د ئەنجامێ دا زارۆکەک ھاتە کوشتن و شەش کەسێن ئەندامێن مالباتێن داعشێ بریندار بوون.

رەوانگەھێ ئاشکەرا کر؛ ھەژمارەک ئەندامێن مالباتێن داعشێ یێن ل ناڤا کامپا ھۆلێ ھەول دانە کو دو زیرەڤانێن بەشا کۆچبەران دیل بگرن، لێ ژ ئالیێ زێرەڤانێن کامپێ ڤە تەقە ل وان ھاتنە کرن و د ئەنجامێ دا زارۆکەکێ 10 سالی ھاتیە کوشتن و 6 کەسێن دی ژ ئەندامێن مالباتێن داعشێ یێن ل ناڤا کامپێ بریندار بوونە و برینێن بەشەک ژ وان گرانن.

دەمەکە ل ناڤا کەمپا ھۆلێ تاوانێن کوشتنێ زێدە بوونە، ل گۆر ئامارەکا رەوانگەھا سووری، تەنێ د مەھا بۆری دا 4 تاوانێن کوشتنێ ژ ئالیێ ئەندامێن مالباتێن داعشێ ڤە ل ناڤ کامپێ ھاتنە کرن، کو ژ دو پەنابەرێن ئیراقی و ئاوارەیەکێ سووری و ئەندامەکی ھاوارچوونێ یێ خزمەتگوزاریا کامپێ پێک ھاتبوون.

ھەروھا دەستنیشان کریە کو د ناڤا سالا 2021ێ دا 84 تاوانێن کوشتنێ ل ناڤا کامپێ ھاتنە ئەنجامدان و 89 کەس ھاتنە کوشتن، کو ژ وان دو کەس ئەندامێن ئاساییشێ، 67 کەس پەنابەرێن ئیراقی، د ناڤ وان دا 3 زارۆک، 19 ژن و 20 کەسێن ھلگرێن ناسنامەیا سووری بوون.