تەڤگەرا دەمۆکراتیکا کوردستانێ ل سەر بنپێکرنێن چەکدارێن پەیەدێ ل رۆژئاڤایێ کوردستانێ داخویانیەک پارڤەکر و تێدا راگهاند، رێڤەبەریا خوەسەر، ل گۆری پرەنسیپ و ئایدۆلۆژییا پەکەکێ ل رۆژئاڤایێ کوردستانێ ب میتۆدێن یەکرەنگی، یەکدەنگی و تۆتالیتاری ڤە جڤاکی دیزاین دکەت.
هەر وەها د داخویانیا خوە دا بانگ ل رێڤەبەرییا خوەسەر کر کو رێزێ ژ نەرین و ھەلوەستێن دەرڤەیی خوە بگرن. دەست ژ قەدەغەکرنا تیڤی، رادیۆ و پارتییێن دەرڤەیی خوە و ژ دەستدرێژییێن نەمەشرووع و تۆتالیتار بەردەن.
داخویانیا تەڤگەرا دەمۆکراتیکا کوردستانێ ب ڤی ئاوا یە:
رێڤەبەرییا خوەسەر، ل گۆری پرەنسیپ و ئایدۆلۆژییا پەکەکێ ل رۆژئاڤایێ کوردستانێ ب میتۆدێن یەکرەنگی، یەکدەنگی و تۆتالیتاری ڤە جڤاکی دیزاین دکەت. ئەو نە ل گۆری بەرژەوەندییێن ملەتێ کورد، بەلکو د خزمەتا بەرژەوەندییێن ئایدەۆلۆژیک دا تەڤدگەریت.
ب دەھان جارانە کو ژ ئالییێ ھێزێن نەناس، لێ ژ ئالییێ رایا کوردستانییان ڤە ناسکری نە، ئێریش ھاتنە سەر مەدیایێن دەرڤەیی ئایدۆلۆژییا یەکرەنگی و تۆتالیتاریا رێڤەبەرییا خوەسەر. ئێریشێن “جوانێن شۆرەشگەر” و رێخستنێن ژنان یێن سەر ب پەکەکێ و رەڤەبەریا خوەسەر ڤە و ھەروەھا ھەلوەستا ژکارئێخستنا دەستوورێ کارێ تەلەڤیزیۆنا رووداوێ و قەدەغەکرنا کارێ وێ ل رۆژئاڤایێ کوردستانێ، نە کریارێن مەشرووعن و نە ژی ھەلوەستێن ل گۆری پرەنسیپێن جڤاکەک دەمۆکراتیکن.
جڤاکەک کو ژ تۆرا مەدیایا ئازاد بێ بار بیت، نە جڤاکەک ڤەکری و مەدەنییە. رێڤەبەرییا خوەسەر، دخوازیت جڤاتێ ب میتۆدێن توندوتیژیێ ئیدارە بکەت. ئەو تەحەموول و رێزێ ژ نەرین و ھەلوەستێن جودا ناگریت و دخوازیت جڤاکەک ل سەر ئەساسێ یەکرەنگی و یەکدەنگیێ ئاڤا بکەت. ئەو دخوازن جڤاتا پڕ رەنگ و پردەنگ قەدەغە بکەن و ب ڤی ئاوایی ل دژی بەرژەوەندییێن خەلکێ تەڤدگەرن. مخابن ئیرۆ ل رۆژئاڤایێ وەلاتێ مە، بنخەتێ، جڤاتەک وەھا ژ رەنگ و دەنگێن جڤاتەتەکا پڕەنگ بدوورکەتی و دوور تێ ئاڤا کرن.
ئەم بانگی رێڤەبەرییا خوەسەر دکەین کو رێزێ ژ نەرین و ھەلوەستێن دەرڤەیی خوە بگرن. دەست ژ قەدەغەکرنا تیڤی، رادیۆ و پارتییێن دەرڤەیی خوە و ژ دەستدرێژییێن نەمەشرووع و تۆتالیتار بەردن.
پردەنگییا جڤاتا مە دەولەمەندییا مەیە. ئەو بنگەھێ جڤاتا شارستانی یا کوردستانێ یە. دڤێت ئەم ب ھەستەکێ نەتەوەیی و دەمۆکراتیک ڤێ شارستانییا خوەیا دەولەمەند بپارێزین!
تەڤگەرا دەمۆکراتیکا کوردستانێ
تەدەکە-تەڤگەر
6/2/2022
