پارلەمەنتەرێ بەرێ یێ ھەدەپێ ئالتان تان، د مەدیاسکۆپێ دا بەرسڤا پرسێن رۆژنەمەڤان «روشەن چاکر» ددەت و د دەربارێ ھەدەپێ و ئۆجالان دا ھندەک تشتێن بالکێش دبێژیت.
ئالتان تان دبێژیت: دڤێت ھندەک تشت بێنە گۆتن. ھەدەپە و حکوومەت ل سەر مێزەی نە روونشتن، بەلکو حکوومەت و ئۆجالان روونشتن. ھەدەپە د ناڤ وان دا دچوو و دھات. من پشتی ھەڤدیتا یەکەم نەرازیبوونا خوە دیار کر و گۆت: “ئەم نە پۆستەچی نە، ئەگەر گۆتنەکا من ھەبیت ئەز دێ ب خوە چم بێژم، ئەگەر ئەز ب ناڤێ خوە، پارتیا خوە و گەل گۆتوبێژێ دەکەم و ئەز د ڤی کاری دا ھەمە، ئەگەر پۆستەچی بم ئەز دێ بێژم ھەرن پۆستەخانەیێ“ پشتی جڤینا یەکەم ئەز ژ شاندێ دەرێخستم، ھەڤالێن من ژی ل من خوەدی دەرنەکەتن. سەلاحەدین بەگ ژی ل من خوەدی دەرنەکەت. کەسەکێ نەگۆت چما ھوون ڤی ژ شاندێ دەرتێخن. ھەڤالێن کو بۆچوون قەبوول کرین گۆتوبێژ بەردەوام کرن.
د وی دەمی دا ئاخاڤتنێن سەلاحەدین بەگ ژی ھەنە کو دگۆت: “ئەم دێ پەیکەرێ ئۆجالان دانین” ئەگەر ئیرادەیا تە ئیرادەیا سەرۆکاتیێ بیت، موخاتاب ئۆجالانە. ژ بۆ ڤێ ئەگەر ئۆجالان ل سەر وی مێزەیێ رابیت و بێژیت ئەڤ کارە خلاس بوو، خلاس دبیت، بەردەوام بکە بەردەوام دکەت. ئەڤ یەک ژ بۆ من دەرباس نابیت، من ئەڤو گۆتە وان و خوە دا ئالیەکی. ھەتا ئۆجالان ل سەر مێزەی رانەبیت و تو گاڤێن وی ئاڤێتین ڤالا دەرێخی ئۆجالان ژ ڤێ یەکێ عاجز دبیت.
د بەردەوامیا ئاخاڤتنا خوە دا ئالتان تان دبێژیت: د سەری دا “ئەم تە ناکەینە سەرۆک” ڤەکری بێژن ئەڤ گۆتنە ژ کوو دەرکەت؟ چەوا ئەڤ یەک ھاتە رۆژەڤێ، ھەلوەستا ئۆجالان ل ھمبەر ڤێ گۆتنێ چبوو؟ رابن ڤێ یەکێ ئاشکەرا بکەن. ئەز ناڤەرۆکا ڤێ ھەموویێ دزانم، ئەگەر پێوست بیت ئەز دێ رۆژەکێ ئاشکەرا کەم. ئۆجالان گەلەک ب توندی ھەلوەست ل ھمبەر ڤێ یەکێ دیار کر. ئۆجالان دبێژیت “ڤی کاری سەر راست بکەن” بەلگەیێن ڤێ ھەموو ھەنە.
ئالتان تان ئاخافتنا خوە بەردەوام دکەت و دبێژیت: ھەرکەس دزانیت کو ئۆجالان عاجز بوو، ئەڤە نە تشتەک نھێنی و ڤەشارتیە. ھەموو ئاگاھی د دەستێ حکوومەتێ دا ھەنە. ئەم بێژین لایەنەک ڤان ئاگاھیان ئاشکەرا ناکەت، باشە تو ژ بۆ چ ئاشکەرا ناکەی؟ ھەموو ھەڤدیتن ھاتنە قەیدکرن. ئۆجالان نەگۆتیە کو من ئەڤ کارە خلاس کر ئەز ئێدی ڤێ یاریێ ناکەم. ئۆجالان سەر مێزەی رانەبوویە. تو ژ ئالیەکێ ڤە دبێژی ئیرادا من ئۆجالانە و ژ ئالیێ دی ڤە تو گوھ نادەیە ئۆجالان و وی ڤالا دەرتێخی. د قۆناغا داوی یا “پێڤاژۆیا چارەسەریێ” دا ئۆجالان گەلەک ژ ڤان عاجز بوو.
