سه‌كره‌ته‌رێ پارتییا سۆسیالیست ده‌مۆكراتا كوردستانێ، هن ئاگاهی ل ده‌ربارێ رێخستنا په‌كه‌كێ ئه‌شكه‌ره كرن و راگهاند، ده‌ما ئه‌ڤ پارتی هاتییه دامه‌زراندن، تەڤ پارتیێن دنێن ل باكورێ كوردستانێ تاسفییه كرن.
محه‌مه‌د حاجی مه‌حموود د رووپه‌لا 32 – 33 ژ به‌رگا پێنجه‌مین ئا پرتووكا بیره‌وه‌ریێن خوه ده كو ب ناڤێ «رۆژمێرێن پێشمه‌رگه‌یه‌كی» وه‌شاندنه، باس ل بوویه‌رێن سالێن 90ان ژ سه‌ده‌یا رابووری دكه و دبێژه: په‌كه‌كه هێزه‌كه كوردستانا تركیێ یه، ژ هێلا عه‌بدوللا ئۆجالان ڤه هاتییه ئاڤا كرن، باوه‌رییا ڤێ هێزێ ب تو هێزێن دن یێن كوردی تونه، هه‌ر ل ده‌ستپێكێ هه‌ر چ پارتی و ته‌ڤگه‌ره‌كه كوردی ل باکورێ کوردستانێ هه‌یه، تاسفییه كرن و هه‌موو ژ ناڤ برن.
محه‌مه‌د حاجی مه‌حموود ئاماژه ب داگیركرنا ناڤچه‌یێن پارێزگه‌هێن دهۆك و هه‌ولێرێ ژ هێلا په‌كه‌كێ ڤه دكه و دبێژه: پاش سه‌رهلدانا ئادارا 1991ان، په‌كه‌كێ سوود ژ ڤالاتییا ئه‌وله‌هیێ یا ل باشوورێ كوردستانێ وه‌رگرت و به‌شه‌كا هه‌ری مه‌زن ئا ناڤچه‌یێن سینۆرێ دهۆكێ و برادۆستا گرێدای هه‌ولێرێ گرتن ده‌ستێ خوه، باره‌گه‌هێن خوه ل بادینان چێكرن، پێشی ل وان هه‌مولاتییان دگرت یێن كو ره‌ژیما به‌عس ده‌ربه‌ده‌ر كربوون و نه‌هشت ڤه‌گه‌رن گوندێن خوه.
هەر وەها سه‌ده‌مێن هاتنا ئارتێشا تركیێ بۆ سینۆرێ باشوورێ كوردستانێ ژ بۆی په‌یمانه‌كه به‌رێ یا ل نێڤبه‌را ره‌ژیما ئیراقێ و ئه‌نقه‌رێ ده ڤه‌گه‌راند كو ل گۆری وێ پەیمانێ ئارتێشا تركیێ دكاره 15 هه‌یا 20 كیلۆمه‌ترۆیان ژ بۆی لێدانا په‌كه‌كێ ده‌رباسی سینۆرێ باشوور ببه، د وان ده‌ما ده، په‌كه‌كێ ل ناڤچه‌یێن بادینان ئێریش برن سه‌ر تركیێ و ل ناڤ خاكا كوردستانێ ل باژارۆكان باره‌گه‌هـ ژ خوه ره چێكرن و ده‌ست ب خه‌باتا چه‌كداری و سیاسی كر و بێی كو ده‌ستوورێ ژ په‌ده‌كێ، یه‌نه‌كێ یان حكوومه‌تا باشوور وه‌ربگره، تركیه ژی ب ڤێ یه‌كێ هێرس بوو.
محه‌مه‌د حاجی مه‌حموود د پرتووكا خوه ده د بێژه: په‌كه‌كێ باهوه‌ری ب خه‌باتا ل گه‌ل ت پارتیێن كوردستانی نینه، باهوه‌ری ب هه‌ڤپه‌یمانه‌تیێ تونە، به‌لكو ل گۆری وێ دڤێ پارتیێن هه‌موو پارچه‌یێن كوردستانێ ئۆجالان وه‌كه سه‌رۆكێ نه‌ته‌وی یێ كوردان قه‌بوول بكن و په‌كه‌كه هه‌ر بریاره‌كا بده جی ب جی بكن.
ل ده‌ربارا پێوه‌ندییا ب ده‌وله‌تێن داگیركه‌ر ره، محه‌مه‌د حاجی مه‌حموود دبێژه: په‌كه‌كه ب ناڤێ كوردستانا مه‌زن و تشتێن عاتیفی باوه‌ریێ ژ هنه‌ك كه‌سان ره چێدكه، توهمه‌تان ژ پارتیێن كوردستانی رە چێدکە و وان ب پێوه‌ندیێن ل گه‌ل ده‌وله‌تێن هه‌رێمی سووچبار دكە، لێ به‌لێ په‌كه‌كێ به‌رێ و نها ژی باشترین پێوه‌ندی ل گه‌ل هه‌ر یێك ژ ئیرانێ، ئیراقێ و سووریێ هه‌نه و ئه‌ڤ پێوه‌ندیێن وێ هێژان ده‌وام دكن.
