ئارتێشا ئیراقێ ب بەھانەیا کو گرتیگەھا کو گرتیێن داعشێ تێ دا نە، د بن مەترسیێ دایە، ناڤ باژارێ کەرکووکێ تژی ھێزێن سەربازی و ترۆمبێلێن سەربازی کرینە.
ئارتێشا ئیراقێ ھەر جارێ ب بەھانەیەکی باژارێ کەرکووکێ ملیتاریزە دکەت و ل ناڤ باژێری تژی سەرباز و ترۆمبێلێن سەربازی دکەت و خەلکێ دترسینە.
ل گۆری زانیاریان، ئەڤە چەند رۆژن ئارتێشا ئیراقێ ب بەھانەیا کو گرتیگەھا گرتیێن داعشێ تێ دا نە، د بن مەترسیێ دایە، ناڤ کەرکووکێ تژی سەرباز و ھێزێن تایبەت و ترۆمبێلێن سەربازی کرینە.
د دەمەکی دا ئەو گرتیگەھا کو گرتیێن داعشێ تێ دا نە، ب توندی دهێتە پاراستن و بەشەک مەزن ژ گرتیێن مەترسیدار یێن داعشێ ژی ژ وێ گرتیگەھێ دەرباسی گرتیگەھێن بەغدا و سلێمانیێ ھاتنە کرن، ژ بەر وێ ژی بەھانەیا ئارتێشا ئراقێ بۆ بجیھکرنا سەربازان ل ناڤ کەرکووکێ زێدە نە یا د جھێ خوە دایە.
ئەو ھێزێن وان ژی ب فەرمانا فەرماندەیەکێ ئیراقی ب ناڤێ عەلی فرێجی ل ناڤ باژێری ھاتنە بجیھکرن. فرێجی ب وێ یەکێ تێ ناسکرن کو نەیارەکێ توندرە یێ کوردانە.
وی فەرماندەیی پشتی ھلبژارتنێن ئیراقێ ژی، کو کوردان کارین 6 کورسیان ب دەست بینن، ژ کەربا سەرکەفتنا کوردان تژی ناڤ باژێری ھێزێن سەربازی کربوون.
