رەڤاندن و چەکدارکرنا زارۆکان ژ ئالیێ پەکەکێ و رێخستنێن دی یێن سەر ب وێ ڤە بەردەوامە، ب ئاوایەکێ کو ب تەنێ د مەها یەک یا ئیسال دا نێزیکی 10 زارۆکێن رۆژئاڤایێ کوردستانێ ژ ئالیێ «جوانێن شۆرەشگەر» ڤە کو رێخستنەکا سەر ب پەکەکێ یە هاتنە رەڤاندن و پشترا ئەو چەکدار کرینە.
پێگەها «دارکا مازی» ژ چاڤکانیێن خوە یێن ل رۆژئاڤا کوردستانێ زانیاریێن هەری نوو ل سەر رەڤاندنا 3 زارۆکێن دی کو تەمەنێ وان د بن 18 سالیێ دایە ب دەست خستنە. ل گۆر زانیاریان د دەستپێکا کانوونا ئیسال دا ل کامپا «بەرخوەدان» یا کو دکەڤیتە گوندێ «فافینێ» یێ سەر ب باژارێ حەلەبێ کو کامپەکا تایبەتە ب ئاوارەیێن عەفرینێ، 3 زارۆک یەک ژێ کەچ ژ ئالیێ جوانێن شۆرەشگەر ڤە هاتنە رەڤاندن، لێ بەلێ ب تەنێ ناڤێ یەک ژ زارۆکان هاتیە زانین کو ئەو ژی «حەسەن عەبدو مەنانە».
چاڤکانیێن مە ئاشکەرا کر، پشتی ئەڤ سێ زارۆکە هاتیە رەڤاندن، ل رۆژا 7/1/2022ێ مالباتێن وان ئێریشی بارەگەهێ «جوانێن شۆرەشگەر» یێ ل کامپا «بەرخوەدان» کر، پشتی ئێریشێ هەموو کادرۆیێن تەڤگەرا «جوانێن شۆرەشگەر» د ڤی بارەگەهی دا ژ ترسان دا رەڤییانە.
چاڤکانیێن دارکا مازی هەر وەها ئاشکەرا کر، مالباتێن زارۆکا پشتی دەست دانایە سەر بارەگەهێ جوانێن شۆرەشگەر خواستیە بارەگەهێ وان بشەوتینن، لێ بەلێ کادرۆیەکا پەکەکێ یا ب ناڤێ «سەیران» کو دبیتە خزما یەک ژ زارۆکێن رەڤاندی چوویە وێرێ و نەهێلایە بارەگەهی بشەوتینن.
ئەڤ کارڤەدانا مالباتێن زارۆکێن رەڤاندی پشتی ڤێ یەکێ دهێت کو ب دەهان جاران داخواز ژ «جوانێن شۆرەشگەر» کری زارۆیێن وان ل وان ڤەگەرینن داکو بکارن ل خوەندنگەهان دا بخوینن، لێ بەلێ ژ بەر کو «جوانێن شۆرەشگەر» بریار و هێزا خوە راستەراست ژ پەکەکێ وەردگریت هیچ گرنگیەک ب داخوازا وان نەدایە و هەردەم گۆتیە مالباتان، زارۆیێن هەوە ب کێفا دلێ خوە دخوازن ببنە چەکدار، ئەم نزانین ئەو ل کو دەرێ نە، مە چ پەیوەندی ب وانڤە نینە.
