ئەنداما کۆنسەیا سەرۆکاتیا گشتی یا کەجەکێ سۆزدار ئاڤێستا بەشداری بەرنامەیا چرا تیڤی یا تەلەڤیزیۆنا پەکەکعێ یا ژ بۆ ئێزدیان وەشانێ دکەت بوو. سۆزدار ئاڤێستا کو د بەرنامەیێ دا نرخاندن ژ بۆ ئینانا عەڤدللا ئۆجالان ژ بۆ ترکیەیێ کرن، دیسا ژ بۆ شەرمەزارکرنا ھەرێما کوردستانێ درەوێن بێ ئەخلاقانە بەلاڤ کرن.
ئەنداما کۆنسەیا رێڤەبەرا کەجەکێ سۆزدار ئاڤێستایێ، پشتی کو د ھەڤپەیڤینا خوە دا ئیدیعا کر کو ئامەریکایێ و ھێزێن دن ل دژی پەکەکێ کوردێن دن یێن پاشڤەروو پێش دخن. گۆت: “وێ دەمێ پەدەکێ ژ بۆ کو ئەورۆپا مافێ پەنابەریێ نەدەتە رێبەر ئاپۆ، نامەیەک ژ بۆ دادگەھا رۆما فرێکر. ئەو نامە د ئارشیڤێ مە دا هەیە. ژ بەر ڤێ یەکێ ئەم دبێژین کو پیلانگێریەک ل دژی فکرا ئازاد و ڤیانا ئازاد ھاتیە کرن.”
رێڤەبەریا پەکەکێ ھەر سال د تەڤاھیا مەھا شوباتێ دا ژ بۆ بیرئانینا ڤەگەرا عەبدوللا ئۆجالان بۆ ترکیایێ یا د 15ێ شوباتێ دا ھەڤدیتنان ئەنجام ددەت، ھەر کەسەکێ تاوانبار دکەت و ژ بۆ کو کارتێکرنەک ھەستیار چێبکەت نیقاشێن نوو دروست دکەت. ئیسال ناڤێن ناسکری یێن پەکەکێ ھەڤپەیڤین ئەنجام دان.
پەکەکە د ڤان سالێن داوی دا ھەول ددەت د ھەر بوویەرەکا ئیرۆیین و دیرۆکی دا پەدەکێ، ھەرێما کوردستانێ سووچبار بکەت، داکو خوە ژ بۆ ئێریشا ل دژی ھەرێما کوردستانێ و ھێزێن پێشمەرگە ئامادە بکەت. د ڤی واری دا د ڤان سالێن داویێ دا د مەدیایا پەکەکێ دا ھۆڤیتیەکا مەزن یا نووچەیێن ساختە ھەیە. د دەمێن داوی دا رێڤەبەرێن پەکەکێ راستەراست ڤان درەوان تینن زمان.
گۆتنا سۆزدار ئاڤێستا درەوەکا ئاشکەرایە. ئەگەر د ئارشیڤا پەکەکێ دا بەلگەیەکا وەھا ھەبایە، ھەتا نھا پەکەکە دا وێ بەلگەیێ ئاشکەرا کەت. ھەر وەھا چ سەبەب نینە بەلگەیا کو ژ بۆ دادگەھێ ھاتیە نڤیساندن د ئارشیڤا پەکەکێ دا هەبیت. ل گۆری ئاخافتنا سۆزدار ئاڤێستایێ، دبیت کو د دەمەک نێزیک دا پەکەکە نامەیەکا ووسا یا ساختە بەلاڤ بکەت.
چیرۆکا برنا عەبدوللا ئۆجالان بۆ ترکیایێ بوویەرەکە کو پێدڤییە ژ گەلەک ئالیان ڤە بهێتە زەلالکرن. ھەر وەھا گەلەک زانیاری ھەنە کو ئۆجالان ب خوە لگەل دەولەتێ دا رێکەفتن کریە. ھەر وەھا ژ چوونا ئۆجالان بۆ ترکیایێ تەنێ ترک سوودمەند بوونە.
