سەردۆزگەریا کۆماری یا دیاربەکر و وانێ، ل سەر سکالایان؛ د دەرحەقێ ھندەک کەسان دا، ب بەهانەیا کو دێ د سالڤەگەرا گرتنا رێبەرێ پەکەکێ عەبدوللا ئۆجەلان دا چالاکیێ ئەنجام دەن، بریارا دەستەسەرکرنێ دا. د ئەنجاما ئۆپەراسیۆنێن کو ژ 14ێ شوباتێ ڤە ھاتنە کرن دا ژی، ل دیاربەکر، مێردین، وان و جۆلەمێرگێ 69 کەس ھاتنە دەستسەر کرن.
ل گۆر ئاگاھیێن ھاتنە راگھاندن، ل دیاربەکر و مێردینێ 27 کەس، ب بەهانەیا کو سکالا ھاتیە کرن دێ د سالڤەگەرا گرتن و ئانینە ترکیایێ یا رێبەرێ پەکەکێ عەبدوللا ئۆجەلان دا چالاکیێ ئەنجام دەن، ھاتنە دەستەسەر کرن و ھندەک کەسێن کو سکالا ل سەر ونا ھاتیە تۆمار کرن ژی ل ناڤنیشانێن دیارکری نەھاتنە پەیدا کرن.
دیسا ل وانێ ژی ل 3 باژاران ب بەهانەیا کو پرۆپاگاندایا رێخستنا تەرۆری کرنە و پشتگریا رێخستنێن تەرۆری دکەن ئۆپەراسیۆن ھاتنە لدار خستن و د ئەنجاما وان ئۆپەراسیۆنان دا ژی ل جۆلەمێرگێ 12، ل وانێ ژی 30 کەس ھاتنە دەستەسەر کرن.
د ناڤا کەسێن کو ھاتنە دەستەسەرکرن دا، ژ رێخستنا جوانان یا پارتیا دەمۆکراتیکا گەلان «ھەدەپێ» و «تەڤگەرا ژنێن ئازاد TJA» ژی ئەندام و رێبەر ھەنە.
رێبەرێ پەکەکێ عەڤدللا ئۆجەلان پشتی د 15ێ شوباتا 1999ێ دا ل کینیایێ ھاتیە دەستسەرکرن، ژ بۆ ترکیایێ هات ڤەگوھاستن. پەکەکەیی ژی وێ رۆژێ وەک رۆژا پیلانگێریێ پێناسە دکەن و دبێژن ل ھەمبەر ئۆجەلان پیلانگێرییا ناڤنەتەوەیی ھاتیە کرن.
