رێڤەبەرییا بارۆیا ئامەدێ و رێڤەبەرییا کۆمەلەیا شێخ سه‌عید كۆمبوون و ل ده‌ربارێ پێڤاژۆیا یاسایی یا ژ بۆ ئاشکەرا کرنا گۆرا شێخ سه‌عید و هەڤالێن وی گۆتووبێژ کرن.
سەرۆکاتییا بارۆیا ئامەدێ ل سەر ئه‌كاونتا خوە یا تویتەرێ راگه‌هاند کو سەرۆک و ئەندامێن رێڤەبەرییا بارۆیێ سەره‌دانا کۆمەلەیا شێخ سه‌عید کرنە.
بارۆیا ئامەدێ دا زانین کو د ڤێ سەره‌دانێ دا، ژ بۆ دەستپێکرنا پێڤاژۆیا یاسایی ب ئارمانجا ئاشکەرا کرنا گۆرا شێخ سه‌عید و هەڤالێن وی كۆمبوونه‌كا بەرهەمدار هاتییە کرن.
سەرۆکێ کۆمەلەیا شێخ سه‌عید و نەڤیێ شێخ سه‌عید قاسم فرات، گۆتن: «ئەم دێ د ناڤا ڤێ حه‌فتیێ دا ل گەل بارۆیا ئامەدێ و ئالیێن یاسایی یێن ل ئامەدێ ب ئارمانجا ئاشکەرا کرنا جهێ گۆرا شێخ سه‌عید دێ سه‌ره‌دانا دادگەهێ كه‌ن، ئەز نەڤیێ وی مە و دخوازم جهێ گۆرا باپیرێ من بهێته ئاشکەرا کرن، ئەم دێ هەتا داویێ ژ بۆ ئاشکەرا کرنا جهێ گۆرا وی تەکۆشینا خوە بەردەوام بکه‌ین».
شێخ سه‌عید سالا 1865ێ ل ناڤچەیا پالوو یا خارپێتێ ژ دایک ببوو و ل باکورێ کوردستانێ شێخەکی گرنگ و ناڤدارێ تەریقەتا نەقشبەندی بوو، شێخ سه‌عید ل باژارێ خنسێ یێ سەر ب ئەرزەرۆما باکورێ کوردستانێ خواندنا خوە یا ئۆلی ته‌مام كربوو.
سەرۆکێ کۆمەلەیا سەرخوەبوونا کوردستانێ بوو و ل گەل هەژمارەک پارلامەنتەرێن کورد و مەزن و سەرکردەیێن کوردێن وێ دەمێ بریار دا، کو ل دژی حکوومەتا کۆمارا ترکیێ و تەڤگەرا نه‌ژادپەرستا کەمالیستان سەرهلدانێ بکەت، ئارمانجا شۆرەشا وان سەرخوەبوونا کوردستانێ بوو و رۆژا 13ێ سباتا 1925ێ ب کۆنترۆلکرنا ناڤچەیا لجێ یا ئامەدێ دەست ب شۆرەشا خوە کرن.
ل دەستپێکێ و د سالا 1924ێ دا شێخ سه‌عید نامەیەک بۆ کۆمەلەیا نەتەوه‌یان شاند و تێدا ئاماژە ب رەوشا گەلێ کورد و داخواز و مافێن کوردان کر، پاشێ ژ بۆ بدەستخستنا پشتگری و پشتەڤانییا سەرۆک عەشیرێن کورد یێن ل باشوور، رۆژئاڤا و رۆژهلاتێ کوردستانێ، سەره‌دانا وان پارچەیان کر و بۆ دەما سالەکێ مژوولی ئامادەکاریێن سەرهلدانێ و دەستپێکرنا شۆرەشێ بوو.
سەرهلدانا شێخ سه‌عید د دیرۆکا کوردێن باکورێ کوردستانێ دا بەرفرەهترین سەرهلدانە کو ل 14 باژار و ناڤچەیان بەلاڤ ببوو، د هەمان دەمی دا یەکەم سەرهلدان بوو کو پرانییا پێشەنگێن وێ ب هەڤ را هاتن سێداره دان.
پشتی سەرهلدانا شێخ سه‌عیدێ پیران راستی شکەستنێ هاتی و ئەو و گەلەک هەڤالێن خوە هاتن گرتن، ل 10ێ گولانا 1925ێ ئەو ل همبه‌ری دادگەها سەرخوەبوونێ یا رۆژهلات (شارک ئیستقلال ماهكه‌مه‌س) یا ئامەدێ راوه‌ستیا.
نێزیکێ پێنجی رۆژان دادگه‌هكرنا وان دەوام کر، ل 28ێ خزیرانا 1925ێ، دەربارێ شێخ سه‌عید و 46 هەڤالێن وی دا دادگەهێ بریارا سێداره‌دانێ دا.
پشتی بریارا دادگەهێ، 28 کەس ژ هەڤالێن شێخ سه‌عید و بەشدارێن سەرهلدانا 1925ێ ل رۆژا 28ێ خزیرانێ و یێن دی و شێخ سه‌عید ب خوە ژی ل 29ێ خزیرانا 1925ێ ل تاخا دەریێ چیێ یا ئامەدێ هاتن سێداره‌دان.
ژ وێ رۆژێ هەتا نها ناهێته زانین کا دەولەتا ترکیێ جەنازەیێ شێخ سه‌عید و هەڤالێن وی ل کودەرێ ڤەشارتنە و گۆرا وان هێژان نەدیارە، مالباتا شێخ سه‌عید و كورد ب ئاوایەکێ گشتی و رێخستن و سازیێن کوردی ژ دەولەتا ترکیێ دخوازن کو جهێ گۆرا شێخ سه‌عید و هەڤالێن وی بهێته ئاشكه‌را كرن.
