رێخستنا په‌كه‌كێ ئیرۆ ناسنامه‌یا 4 گه‌ریلایان ئه‌شكه‌ره كر كو 3 ژ وان د ته‌مه‌نا زارۆكتیێ دا نه و به‌ری 6 سالا ب ده‌ستێ ئارتێشا ترك دانه كوشتن و ژ نوو ئیرۆ مرنا وان راگهاند.
رێخستنا په‌كه‌كێ ئیرۆ رۆژا چارشه‌مبی 16/2/2022ێ، ناسنامه‌یا 4 گه‌ریلایان راگهاند كر كو ل سالا 2016ێ ژ هێلا ئارتێشا ترك ڤه هاتنه ئارمانج گرتن و ژ نوو ئیرۆ و پاش ده‌رباسبوونا 6 سالان هاتییه و مرنا وان راگهاندییه.
ئه‌ڤ گه‌ریلا كو 3 ژێ د ته‌مه‌نا زارۆكتیێ دا نه، په‌كه‌كێ د به‌یانا راگهاندنا شه‌هاده‌تا وان دا ب روو قایمی گۆتییه: «ئه‌و ملیتانێن هێژا یێن ئاپۆ بوون، وان هێژان د زارۆكتییا خوه دا رێخستن و رێبه‌رتی ناس كرییه، ئه‌م وان ب رێزداری ل بیر تینن».
رێخستنا په‌كه‌كێ ژ بۆی چێكرنا شه‌رڤانان، پشت به‌ستنێ ل سه‌ر ره‌ڤاندنا زارۆكێن كوردان دكه‌ت، په‌كه‌كه زارۆكێن كوردان وه‌كه فیشه‌كا ل به‌ر تفه‌نكا خوه دبینیت و دكاریت هه‌موویان فه‌دایێ ئۆجالان بكه‌ت.
په‌كه‌كێ به‌ری دو رۆژان داخویانی دا و ته‌سلیم بوونا ئۆجالان یا 15 سباتا 1999ێ ب پیلانگیری ناڤ كر و گۆت: 23 سال ده‌رباسبوون، ئه‌م دێ سالا 24ێ كه‌ینه سالا ئازادییا فیزیكی یا رێبه‌رتیێ، ئه‌م دێ ل سه‌ر خه‌تا فه‌دایی یا ئاپۆ به‌رخوه‌دانێ گه‌ش بكن، ئه‌ڤ ژی دهێته واتا‌یا كو په‌كه‌كه دێ ئیسال ژی ل سه‌ر فه‌داكرنا زارۆكێن كوردان بۆ زلامێ ل ئیمرالیێ رازای به‌رده‌وام بیت.
