ئاساییشا پارتییا یه‌كێتییا ده‌مۆكراتیك په‌یه‌دێ، باسكێ په‌كه‌كێ یێ رۆژئاڤا كوردستانێ، رۆژنامەڤان و ئەندامێ ئەنجوومەنا دێركێ یێ پارتییا دەمۆکراتا کوردستانێ «پدک-س» ئەحمەد سۆفی رەڤاند.
ل شەڤا بۆری ئاساییشا په‌یه‌دێ ب سەر مالا رۆژنامەڤان و ئەندامێ ئەنجوومەنا «پدک-س» ێ ئەحمەد سۆفی ل گوندێ بانە قەسرێ یێ سەر ب دێرکێ ڤە گرت و ئەو بەر ب جهەکی نەدیار ڤە رەڤاند.
رۆژنەمەڤان ئەحمەد سۆفی، پەیامنێرێ «ARK tv – Rebaz News» یه و پێشتر د جۆتمەها سالا 2018ێ دا ژی ژ ئالیێ ئاساییشا دێرکێ ڤە هاتبوو رەڤاندن و رۆژا 6 ئادارا 2019ێ هاتبوو بەردان.
ره‌ڤاندنا رۆژنامه‌ڤان ئه‌حمه‌د سۆفی د دەمەکی دا یە، ئاساییشا قامشلۆ ژی ل رۆژا 5ێ ڤێ مەهێ رۆژنامەڤان و پەیامنێرێ «ARK tv» سەبری فەخری بنچاڤ کربوو و ئەو بەر ب جهەکی نەدیار ڤە بربوو.
سکرتارییا گشتی یا ئه‌نه‌كه‌سێ ل دەربارێ رەڤاندنا رۆژنامەڤان و مەدیاکاران ژ ئالیێ هێزێن سەر ب رێڤەبەریا خوەسەر ڤە دبێژیت: «ئارمانجکرنا كارمه‌ندێن راگه‌هاندنێ و سازیێن راگهاندنێ ژ ئالیێ رێڤەبەرییا خوەسەر و کۆمێن وێ یێن چەکدار، زێدەگاڤیەکا نەرەوایە کو ئارمانجا وێ، بێدەنگکرنا رۆژنامەڤانان و ڤەشارتنا تێکچوونا وێ رێڤەبەریێ یه د هەموو ئاستان دا».
هەروها ئه‌نه‌كه‌سێ بانگ ل هەڤپەیمانییا ناڤدەولەتی یا ب پێشەنگییا ئه‌مەریکایێ دکەت، فشارێ ل په‌یه‌دێ بکەت، دا كو ڤان بنپێکرنان ب داوی بینیت و هەموو رۆژنامەڤان و مەدیاکارێن كو ده‌سته‌سه‌ر كرینه، ئازاد بكه‌ت.
