چه‌ته‌یێن تركیێ 13 كورد ژ گوندێن عه‌فرینێ ره‌ڤاندن

چەکدارێن ئۆپۆزیسیۆنا سووریێ یێن گرێدای ئارتێشا ترکیێ كو هەرێما عه‌فرینێ داگیر کرینە، 13 کەس ژ گوندێن عه‌فرینێ رەڤاندن.

ژێدەرەکی ژ رێخستنا مافێن مرۆڤان یا عه‌فرینێ راگه‌هاند؛ ل باژارێ عه‌فرینێ یێ رۆژئاڤایێ کوردستانێ، چەکدارێن ئۆپۆزیسیۆنا سووریێ یێن سەر ب ترکیێ ڤە، ل گوندێ سێمالکا یێ سەر ب ناحیا ماباتایێ، رۆژا 17ێ سباتا 2022ێ رێڤەبەرێ کاروبارێن ئۆلی یێ عه‌فرینێ شێخ یووسف عەبدولعەزیز رەڤاندن.

هەروها ئەشکەرە کر؛ چەکدارێن گرووپا ئەل موعته‌سم بالله، رۆژا 31ێ مه‌ها رابووری ژی، ل گوندێ بەعدینا یێ سەر ب ناحیا راجۆ ڤه‌، وەلاتیێ ب ناڤێ محەمەد مستەفا دەستەسەر کرن.

چەکدارێن گرووپا حەمزات ل ناحیا راجۆ، 5 وەلاتیێن کورد ل گوندێ قدە رەڤاندن، ناڤێن کەسێن رەڤاندی وه‌هایه‌: حوسێن محەمەد، سەلاهح مەنان شێخۆ، محەمەد حەیدەر، ئاسیا محەمەد مووسا، شوکری حوسێن باکیر.

ل گوندێ شادرییە یێ سەر ب ناحیا جندرێسێ ژی، 4 جوانێن ب ناڤێن فەرهاد عەلی، محەمەد فەوزی، محەمەد حەبیب و شوکری محەمەد رەڤاندن و چارەنووسا وان هێژان نه‌دیارە.

هەروه‌ها ل گوندێ میرکان، رۆژا 20ێ سباتێ، دو وەلاتیێن کورد یێن ب ناڤێن خەلیل حسنی حەمدی و مستەفا شێخۆ هاتنه‌ رەڤاندن.