ئایھان بلگەن پارلەمەنتەر و بەردەڤکێ بەرێ یێ ھەدەپێ، کو پێش نها ل سەر بەهرا هەدەپێ سەرۆکێ شەرەداریا قەرسێ ژی بوویە، پشتی وەزەرەتا ناڤخوە ل جهێ وی دا قەیوومەک دانای، ھاتە گرتن و 8 مەھان د گرتیگەھێ دا ما. پشتی دەرکەتی دەست ب رەخنەکرنا ھەدەپێ کر و ژ ھەدەپێ ڤەقەتیا. بلگەن نھا ھەول ددەت پارتیەک نوو ئاڤا بکەت و ژ بۆ ڤێ یەکێ ژی پەیوەندی ب گەلەک کەسێن د ناڤا ھەدەپێ دا ژی کریە و رەوشا پارتیەک نوو ل گەل وان ژی گۆتوبێژ کریە.
ئایھان بلگەن داخویانیا ددەتە مەدیایێ و دەربارێ پارتیا کو دێ ئاڤا کەت زانیاریان ددەت. بلگەن دبێژیت: ئەم دێ ھەتا داوییا مەھا ئادارا 2022یێ دامەزراندنا خوە تەمام کەین. پشترا ئەم دێ ل ھەرێما گەرین و رێخستنێن پارتیێ چێکەین.
بلگەن د بەشەک دن یا داخوویانیا خوە دا دبێژیت: ئەم د ھەموو مەرجان دا حەساب دکەین کو پارتیا خوە بەشداری ھلبژارتنا بکەین. ژ بۆ ڤێ ژی ئەم دکارین ل گەل پارتیەکا دی ھەڤدیتنا بکەین و ب ھەڤرا بەشداری ھلبژارتنا ببین.
بلگەن د بەرسڤا پرسیارەکێ دا دبێژیت: ئەم نابینە ڤێرژنەکا دی یا ھەدەپێ و ئەم ل گەل گرۆپەکێ د ناڤا ھەدەپێ دا ژی رێکەفتنێ ناکەین و دژاتیا ھەدەپێ ژی ناکەین. ئەم دێ دەمۆکراسیێ رێڤە ببەین.
ئارمانجا مە ئەوە کو، ئەم رێکێ ل بەر خەتماندنا دەمۆکراسیێ ڤەکەین. ئەم دێ بەرێ خوە دەینە کوردێن کو دەنگا نادەنە ھەدەپێ و ئەم دێ بەرێ خوە دەینە خەلکەکێ کو مەترسیا وان ژ دەمۆکراسیێ ژی ھەیی. ل گەل ھندەک کەسایەتێن د ناڤا ھەدەپێ دا پەیوەندیێن مە ھەنە. مادەم کو ھەدەپە 10% یا دەنگا ژ جڤاتێ وەردگریت، ئەگەر 100 دامەزرینەر مە ھەبن دڤێت 10 ژ وان د ناڤا ھدددپێ دە بن. ئەم دێ سیاسەتەکا سۆسیال دەمۆکرات برێڤە بەین.
