«جوانێن شۆرەشگەر» زارۆکەکا عەفرینی یا 13 سالی رەڤاند
رێخستنا جوانێن شۆره‌شگه‌ر یا گرێدای په‌كه‌كێ، زارۆكه‌كا عه‌فرینی یا 13 سالی ره‌ڤاند، مالباتا وێ ژی داخوازا ڤه‌گه‌راندنا وێ دكه‌ت.
ته‌وان و جینایه‌تێن رێخستنا جوانێن شۆره‌شگه‌ر ل رۆژئاڤا كوردستانێ به‌رده‌وامن، هه‌ری داوی كچه‌كا 13 سالی یا ب ناڤێ مه‌ریه‌م فه‌رید محه‌مه‌د كو خه‌لكا عه‌فرینێ یه و ل گه‌ل بابێ خوه كۆچبه‌ری كۆبانێ بوویه، ژ هێلا ڤێ رێخستنێ ڤه هاتییه ره‌ڤاندن.
مامێ مه‌ریه‌مێ ژ بۆی كه‌نالا كوردستان 24ێ ئاخڤی یه و گۆت: «برازایا من مەریەم فەرید محەمەد یا 13 سالی ل سالا 2009ێ ژ دایک بوویە، ژ رۆژا 31ێ جۆتمەها 2021ێ ڤە ل گوندێ شێرانێ یێ کۆبانێ ژ ئالیێ تەڤگەرا جوانێن شۆرەشگەر ڤە هاتییە رەڤاندن».
محەمەد حەسەن دیار کر ژی، برایێ وی فەرید و کەچا وی مەریەم، پشتی داگیرکرنا عەفرینێ ژ ئالیێ ئارتێشا ترکیێ و گرووپێن چەکدار ڤە، ژ گوندێ خوە «دێوا» یێ ل ناڤچەیا جندرێسێ کۆچبەر ببوون و دەمەکی ل گوندێ شێرانێ یێ کۆبانێ ب جهـ بووینە.
گۆت ژی: «برایێ من فەرید ژ دەما رەڤاندنا کەچا وی ڤە، ل هەموو ناڤەند و بارگەهێن هه‌سه‌دێ، یه‌په‌ژێ و سازیێن دن یێن رێڤەبەرییا خوەسەر پرسا کەچا خوە كرییه و وی کاری بەری دەمەکی ژی کەچا خوە ل بارەگەهەکێ هه‌سه‌دێ ل باژارێ حەسەکێ ببینیت، لێ فەرماندارێن وێ بارەگەهێ کەچا وی ڤەنەگەراندن».
مامێ مه‌ریه‌مێ ئاماژه ب وێ یەکێ كر، برایێ وی فەرید نەخوەشە و برازایا وی مەریەم كه‌چا ئێكانه‌یه و دایكا وێ ژی ژ بەری چەند سالان وەفات کرییە.
محەمەد حەسەن ب رێیا كوردستان24ێ بانگ ل هەموو سازی و رێخستنێن یاسایی، مافێن مرۆڤان و ئالیێن په‌یوه‌ندیدارێن ناڤخوە و ناڤدەولەتی دکەت کو دەستێوەردانێ بکه‌ن، تا کو برازایا وی مەریەم یا 13 سالی ڤەگەرینن مالێ.
