تەدەکە-تەڤگەر: ئەم د سالڤەگەرا 43یێ دا سەرۆکێ نەمر ب گرامی ببیرتینن

تەدەکە-تەڤگەر: ئەم د سالڤەگەرا 43یێ دا سەرۆکێ نەمر ب گرامی ببیرتینن

ل سەر کۆچا داوی یا رێبەرێ ئەفسانەوی یێ کوردستانێ مەلا موستەفا بارزانی، تەڤگەرا دەمۆکراتیکا کوردستانێ تەدەکە-تەڤگەر داخویانیەک بەلاڤکر و تێدا راگهاند، «سەرۆکێ نەمر موستەفا بارزانی، ب ژییانا خوە، ب ھەلوەستا خوەیا کوردستانی، ب تەکۆشینا خوەیا بێراوەستان و ب داخوازێن خوەیێن نەتەوەیی دێ ئەبەدییەن د دل، ھش و تەکۆشینا ملەتێ کورد دا ژیت.»

داخویانیا تەڤگەرا دەمۆکراتیا کوردستانێ ب ڤی ئاوایە:

ئەم سالڤەگەرا کۆچا داوی یا رێبەرێ نەتەوەیا کورد موستەفا بارزانی ببیر تینن!

سەرۆکێ نەمر موستەفا بارزانی، ب ژییانا خوە، ب ھەلوەستا خوەیا کوردستانی، ب تەکۆشینا خوەیا بێراوەستان و ب داخوازێن خوەیێن نەتەوەیی دێ ئەبەدییەن د دل، ھش و تەکۆشینا ملەتێ کورد دا ژیت.

د گەنجاتیا خوە دا، لگەل مالباتا خوە ژ ئالییێ ھێزێن دەولەتا عۆسمانی ڤە ھاتە گرتن و کۆچبەری زیندانا دییاربەکرێ بوو. د 12 سالییا خوە دا، دارڤەکرنا پاکرەوانێ نەمر عەبدولسەلام بارزانی دیت و د تەڤایا ژییانا وی یا شۆرەشگەری و نەتەوەیی دا، بوو تەجروبەیەک مەزن. وی ب پاکرەوانان سووند دخوار کو چ جاران خوە رادەستی نەیاران نەکەت. لەورا ژییانا خوە ب تەڤایی، ل سەر چییایێن کوردستانێ، ب تەکۆشینا دژی نەیاران دۆماند. چییایێن کوردستانێ و ژییانا سەرۆکێ نەمر ببوو یەک.

ژ سالا 1919ێ ھاتا سالا 1931ێ، لگەل برایێ خوە بابۆ (شێخ ئەحمەد) دا، بەشدارییا سەرھلدانا دژی ئنگلیزا بوو و دیلگرتنا شێخ ئەحەمەد چ جاران ژبیر نەکر. د سالا 1943یێ دا، د شەرێ جیھانی یێ دووەم دا، دژی داگیرکەرێن بەغدایێ سەری ھلدا. لێ مخابن داگیرکەرێن ھۆڤ، سەرھلدانا 1943یێ د سالا 1945ێ دا تێک بر و ب ھۆڤانە ئێریشی ملەتێ کورد کر.

سەرۆکێ نەمر موستەفا بازرزانی، ب ھێزا عەشیر و پێشمەرگەیێن خوە بەشداری ئاڤاکرنا کۆمارا کوردستانێ یا مەھابادێ بوو. د سالا 1946ێ دا، وەک جەنەرال بەرپرسارییا ئارتێشا کۆمارێ دا سەر ملێن خوە. پشتی ھێزێن سۆوڤیەتێ ژ کوردستان و ئازەربایجانێ ڤەکشییان، ھەردوو کۆماردەولەت ھاتن رووخاندن. د ڤێ رووخاندنێ دا، رۆلا ئنگلیز و رووسان یا نەرێنی دیت و خوە رادەستی داگیرکەران نەکر. ئالایێ کوردستانێ، ژ پاکرەوان قازی محەمەد وەرگرت و ب پێشمەرگەیێن خوە ڤە دەرباسی ناڤا یەکیتییا سۆڤیەت بوو.

پشتی 11 سالێن کۆچبەرییێ، ب گوھەرینا دەستھلاتدارییا ئیراقێ ڤە، د سالا 1958ێ دا ڤەگەرییا کوردستانێ. ژ وێ سالێ، ھەتا سالا 1975ێ، لگەل ملەتێ کورد و کوردستانییان دا، دژی داگیرکەرییێ تەڤگەرییا و ئالایێ کوردستانێ ژ دەستێ خوە بەرنەدا. وی، ئالایێ کوردستانێ ل سەر هەموو چییایێن باشوورێ کوردستانێ بلند کر و بوو تەکۆشەرێ ئەفسانەوی یێ لەھەنگ و رێبەرێ نەتەوەیا کورد و کوردستانییان.

سەرۆکێ ئەفسانەوی موستەفا بارزانی، د 1ێ ئادارا 1979ێ دا، ل ئەمەریکایێ ژییانا خوە ژ دەست دا و بەشداری کاروانێ پاکرەوانێن کوردستانێ بوو. روحا وی شاد بیت!

تەکۆشینا مەلا موستەفا بارزانی، دێ رێبەرێ مە بیت!

ئەم تەدەکە-تەڤگەر د سالڤەگەرا 43یێ دا سەرۆکێ نەمر ب گرامی ببیرتینن.

تەڤگەرا دەمۆکراتیکا کوردستانێ

تدک-تەڤگەر  1/3/2022

 

پوستێن ھەمان بەش