جینایەتێن رێخستنا پەکەکێ ل رۆژهلاتێ کوردستانێ زێدەتر دبن، لێ بەلێ ت کەس ل گەلێ رۆژهلات خوەدی دەرناکەڤە و باسی ئێش و ئازارێن کو ئەو ب دەستێ پەکەکێ دکشینن ناکە. پەکەکە ل تەڤ ناڤچەیێن رۆژهلاتێ کوردستانێ ب تایبتی ل ناڤچەیێن کو ب تەنێ ئەو تێدە دەستهلاتدارن جینایەتێن هەری قرێژ ل دژی گەلێ کورد ل رۆژهلاتا کوردستانێ دکە.
پەکەکە ل ناڤچەیێن وەکە «خۆی، سەلامس، ماکو، چالدیران، پۆلدەشت، قەرەجیادین و هتد» کو ب تەڤاهی نێزی 11 باژار و باژارۆکێن رۆژهلاتا کوردستانێ نە و ب گەلەمپەری دکەڤن بن دەستهلاتا پەکەکێ دە جینایەتێن هەری مەزن و قرێژ ئەنجام ددە و هەیا نهاژی ت رێخستن، پارتی یان تەڤگرەک کوردی ل دژی ڤان جینایەتێن پەکەکێ نەهاتیە دەنگ، ب ئاوایەکی کو د مەدیایێ دە ژی دترسن باس ل ڤان جینایەتێن پەکەکێ، بکن.
ناڤچەیێن دکەڤن «باکورێ رۆژهلاتێ کوردستانێ» ژ بەر بێ هەولەستیا پارتێن رۆژهلات بوویە جیهێ نفۆزا پەکەکێ و ژ بلی وێ ت پارتیەک دن تونەیە، ئانکو ئەڤ ناڤچانە بوونە ناڤچەیێن د بن دەستهلاتا پەکەکێ دە و تشتا پەکەکە دخوازە ل ڤان ناڤچەیان بێ ترس دکە.
یەک ژ ولاتیێن رۆژهلاتێ کوردستانێ یێ ب ناڤێ «سلێمان کەریمی» ژ پێگەها «دارکا مازی» رە راگهاند، پەکەکێ ب هەزاران جوانێن کورد ل ڤان ناڤچەیان نەچار کرنە کو کۆچ بکن و بەر ب جیهەک دن بچن، هن ژ وان ب دەستێ رەژیما ئیرانێ دانە گرتن و ب بەهانەیا ئالیکاریکرنا پارتیێن رۆژهلات ژ بال دادگەهێن ئیرانێ ڤە جەزایێ بدارڤەکرنێ ژ بۆی هەژمارەک هەری زێدە یا وان جوانان دەرکەتیە. بۆ میناک، پەکەکێ «فەسیح یاسەمەنی ل کۆتۆلێ، ل گوندێ هندوان یێ سەر ب باژارێ خوێ ڤە ب سێدارەدان دا، سادق سادقی کو ب فەسیح رە بوو لنگەک وی برین و ئیرانێ ژی حوکمێ 30 سال زندانکرنێ ژ وی رە دەرکر، رەزا فەهیمی ب 15 سال زندانکرنێ هات مەحکوم کرن» ل ماکۆیێ ژی ولاتی «شرین علمحولی» دا گرتن و پشترە ژ ئالیێ ئیرانێ ڤە هات سێدارەدان، پەکەکێ «زەینەب جەلالیان» ل ماکۆ دا گرتن و ژ ئالیێ داگەها ئیرانێ ڤە ب زندانیکرنا حەتا حەتایی هات حوکم کرن، «سەید سامی و سەید جەلال» ل باژارێ سەلماسێ دان گرتن و بریارا دارڤەکرنێ ژ بۆی وان دەرچوو. ب سەدان میناکێن دن یێن ب ڤی ئاوا هەنە کو پەکەکێ ب سەدەها کەس ژ گەلێ رۆژهلات دایینە گرتن، هن ژ وان هاتنە دارڤەکرن، هن ب زندانکرنا ئەبەد هاتنە مەحکوم کرن و هن دن ژی هەری کێم 5 سالان هاتنە زندانکرن، ب تەنێ ژ بۆی کو پەکەکە بکارە بەرژەوەندیێن خوە بپارێزە، ترس و خۆفێ د دلێ کوردێن رۆژهلات دە چێدکە.
«سلێمان کەریمی» ئەشکەرە کر، ئەو جوانێن تەڤلی پەکەکێ بوویی و پشترە ب راستیا پەکەکێ زانی و ژ وێ قوت بوویی و ڤەگەریای مالێن خوە، پەکەکە زەختێ ل وان و مالباتێن وان دکە و ئەو ژی نەچار دمینن یان هەرن باشوورێ کوردستانێ یان ژی رێیەکە دن ئا نەدیار بگرن بەر خوە. پەکەکە ب هەڤالبەندیا ب ئیرانێ رە فشارەکە هەری زێدە ل وان جوانان دکە یێن کو ب تەنێ رۆژەکی ژی تەڤلی پەکەکێ بووبن و پشترە دەڤ ژ پەکەکێ بەردابن.
ل گۆر زانیاریێن پێگەها مە، ل پرانیا گوندێن دکەڤن د ناڤا سینۆرێن ڤان باژارن دە بریارگەهێن سوپایێ پاسداران هاتنە ئاڤاکرن، ئەڤ یەک ژی بوویە سەدەم کو ژ بەر زۆلم و ستەما پەکەکە ل خەلکێ دکە، سالانە هەژمارەک زێدە یا جوانان ناڤێن خوە وەکە خۆرۆجی “جاش” تۆمار بکن و ببن لەشکەرێن ئیرانێ، ژ ئالیەک دن ڤە، ل پرانیا گوندان پەکەکە ژ هەر کەسی رە رێژەیەک پەرە دیار دکە و وان نەچار دکە پەرە ب پەکەکێ بدن، کەسێن کو نکارن پەرە بدن یان ژی ناخوازن پەرەیان بدن پەکەکێ، ژ ئالیێ چەکدارێن پەکەکێ ڤە هەقارەت ل وان تێ کرن و ئەو ل بەر چاڤێن گەل تێن شکاندن و بێ بوهاکرن.
ڤی ولاتیێ رۆژهلات هەر وەها ئەشکەرە کر، پەکەکێ مەزنترین درب ل عەشیرێن کوردان یێن ل رۆژهلاتا کوردستانێ خستنە، پەکەکێ ب هەزاران جوانێن عەشیرەکە وەکە «عەشیرا جەلالی» کو یەک ژ مەزنترین عەشیرێن رۆژهلاتا کوردستانێیە ئاوارە و دەربەدەر کرنە، تەڤ رێیێن ژیانێ ل بەر وان تەنگ کرنە و ئەو ل بەرامبەر دو هلبژارتنان نەچار هشتنە، یان وێ ب نەچاری تەڤلی پەکەکێ ببن و سیستەما پەکەکێ قەبوول بکن، یانژی وێ ب سوچێن جودا ب دەستێ رەژیما ئیرانێ وان تەسفیە بکن.
پەکەکێ هەتتا چاڤکانیێن ئابۆری یێن گەلێ رۆژهلات ژی زوها کرنە و تەڤ خستنە بن دەستێ خوە دە، ب ئاوایەکی کو هەر جیهێ بازرگانی تێدە هەبە خستیە بن دەستێ خوە، هەتتا رەحمێ ب کۆلبەران ناکە و ل سەر سینۆر ل هەر جیهێ کۆلبەر تێدە دەرباس دبن د بن ناڤێ باجا ژ بۆ رێخستنێ پەرەیان ل وان دستینە و گوهنادە ئێش و ئازار و سەختییا ژییانا وان.
