ئیرۆ سالڤەگەرا دەستپێکرنا سه‌رهلدانا گەلێ کوردستانێ ل دژی رژێما بەعس یا ئیراقێ یە، کو شیا ژ بۆ جارا یەکەم پرانیا خاکا هەرێما کوردستانێ ژ دەستێ رژێما بەعس رزگار بکەت و کورد ل باشوورێ کوردستانێ دەستهلاتێ ب دەست خوە ڤە بینن.
سه‌رهلدانا گەلێ کوردستانێ د 5ێ ئادارا 1991ان دا ل دژی رژێما بەعس یا ئیراقێ دەست پێ کر و د یەکەم رۆژا سه‌رهلدانێ دا، دەڤەرا رانیا و قەلادزێ هاتن رزگار کرن. پشترە ژی گەلێ کوردستانێ ب پشتەڤانییا پێشمەرگەی رابوون سەر پێیان و کەرکووک و چەند ناڤچەیێن دی رزگار کرن.
سه‌رهلدانا گەلێ کوردستانێ ب پشتەڤانیا پێشمەرگە، ژ ئەنجاما زولم و زۆردارییا رژێما به‌عس یا ل دژی کوردان هات، سەرکەفتن ژی ژ یەکگرتنا گەل و یەکدەنگییا هێزا سیاسی پێک هات، کو شیا د هەیامەکێ کورت دا پرانییا خاکا باشوورێ کوردستانێ رزگار بکه‌ن و داویێ ب دەستهلاتدارییا داگیرکەران بینن.
پشتی سه‌رهلدانێ ب سالەکێ، سەرکرداتییا سیاسی یا کوردستانێ، د 19/5/1992ان دا هلبژارتنا په‌رله‌مانێ هەرێما کوردستانێ ژ بۆ یەکەم جارێ هات کرن، ئەڤ ژی وەک دەستکەفتەکێ گرنگێ یێ گەلێ کورد ل باشوورێ کوردستانێ دهێته هەژمارتن، ژ بەر کو د دیرۆکێ جارا یەکەم جار بوو کورد ببن خودان په‌رله‌مان و حکوومەت. هەرێما کوردستانێ ژ بلی ئەنجامدانا پرۆژەیان د تەڤاهیا واران دا، سەرکرداتییا سیاسی یا کورد شیت د روویێ دیپلۆماسی دا په‌یوەندییان د گه‌ل وەلاتێن جیهانێ دا دروست بکەت و داخواز و مافێن کوردان بگهینیت ناڤەندێن سیاسی یێن جیهانێ.
ئیرۆ ژی کو سالڤەگەرا سه‌رهلدانێ دهێته ب بیرئینان، ب گۆتنا بەرپرسێن پلەبلندێن هەرێما کوردستانێ، هێژان ژی ئاستەنگی و فشار ل ناڤخوە یا ئیراقێ و ل سەر ئاستا هەرێمی ل پێش ستاتوویا هەرێما کوردستانێ هەیە، ب تایبەت د وارێ سیاسی و ئابۆری دا.
