پەکەکە کو خوە ب رێخستنەکە کوردی ددە ناسکرن و پرۆپاگاندا دکە ژ بۆی ئازادیا کوردستانێ هاتیە دامزراندن و د ڤێ چارچۆڤێ دە تەڤ پارتیێن دن یێن کوردستانی ب خایین ددە ناسکرن، ل سەر سینۆرێن دەستکرد یێن داگیرکەرێن کوردستانێ نەخشاندی بوویە گرووپەکە چەتە و تەڤ کارێن قرێژ ل وان سینۆران دکە، ژ وان کاران بازرگانیا مادەیێن هشبەر و یا هەری خەتەر ژی بازرگانیا ب مرۆڤان ڤە یە.
ل گۆر ئاگاهیێن ژ رۆژهلاتێ کوردستانێ د نها دە ل هەرێمێن سینۆری یێن د نێڤبەرا رۆژهلات و باکورێ کوردستانێ دە پەکەکە ب ئاوایەک سیستەماتیک مژۆلی کارێ قاچاخچیتیا مرۆڤانە و مرۆڤان ب ئاوایەک قاچاخ دەرباسی باکور و پارچەیێن دن دکە و ب ڤی ئاوا پەرەیەک زێدە ژ خەلکێ دستینە.
چاڤکانیێن پێگەها دارکا مازی ئەشکەرە کرن، ل هەرێمێن سینۆری یێن د نێڤبەرا رۆژهلات و باکورێ کوردستانێ دە هەر کەسەکی بخوازە بچە ترکیێ و ل ور بەر ب ئەورۆپایێ بچە، ب رێیا پەکەکێ ل سینۆر دەرباس دبە، ل همبەر ڤێ یەکێ ژی پەکەکە پەرە ژ وان دستینە و وان دەرباس دکە، ژ بۆی پەکەکێ فەرق ناکە ئەو کەس کییە و چ دکە، ئا گرینگ وەرگرتنا پەرە یە.
چاڤکانیێن مە هەر وەها ئەشکەرە کرن، پەکەکە رێ نادە ت کەسی دەرڤەی خوە کو ڤی کاری ل سەر سینۆران بکە، هەر کەسێ ژ دەرڤەی پەکەکێ ب ڤی کاری رابە، یان پەکەکە وی تەسفیە دکە یانژی ب دەستێ کۆمارا ئیسلامی یا ئیرانێ ددە گرتن، بۆ میناک ل رۆژێن رابۆری دە ل باژارێ «ماکۆ» هن کەسێن سەر ب پەکەکێ چووینە سەر مالا کەسەکی کو ل سەر سینۆر بێی ئزنا پەکەکێ قاچاخچیتیا مرۆڤان دکە، ژبەرکو ئەڤ کەس ل مالێ نەبوویە ل شوونا وی هەڤژینا وی دەستەسەر کریە و راگهاندیە هەیا کو ئەو خوە تەسلیمی پەکەکێ نەکە وێ هەڤژینا وی د زندانێ دە بە.
هات هین بوون ژ بۆی کو پەکەکە خەلکێ ناچار بکە ب وێ ڤە وەرە گرێدان، دەست خستیە تەڤ وارێن ژیان کرنێ و ژیان ژ هەر کەسێ رە زەهمەت کریە، رێیا یەکانە ژ بۆی ب دەستخستنا کار د نها دە ل پرانیا ڤان هەرێمێن د بن دەستهلاتداریا پەکەکێ دە ئەڤە کو ببی ئەندامێ پەکەکێ و پرۆپاگاندایێ ژێ رە بکی، ژ دەرڤەی ڤێ یەکێ ت کارەکی باش کو تو بکاری مالباتا خوە پێ خوەدی بکی ب دەست ناکەڤە، ئەڤ ژی دبە سەدەما زرار گهاندن ب گەل.
