دادگەھا دیاربەکرێ بۆ مافناس و سیاسەتمەدارێ کورد «ئیبراھیم گوچلو» سزایێ زیندانێ بڕی. سەدەما سزایێ ئەوە کو «ئیبراھیم گوچلو» د نڤیسەکا خوە دا گۆتبوو 19ێ گولانێ نە جەژنا خۆرتێن کوردە و ل سەر ڤێ یەکێ دۆز لێ ھاتبوو ڤەکرن.
ل «دیاربەکرێ» دادگەهێ بریار ل سەر سکالایا ل دژی سەر ئیبراھیم گوچلو دا و د ئەنجامێ دا بۆ مافناس و سیاسەتمەدارێ کورد 10 مەھ سزایێ زیندانێ ھاتە بڕین.
ئیبراھیم گوچلو د 20ێ گولانا سالا 2019ێ دا نڤیسەک ب ناڤێ “19ێ گولانێ نە جەژنا خۆرتێن کوردە” نڤیسیبوو و د 2020ێ دا دەربارێ وی لێپرسین ھاتبوو ڤەکرن و د 2021ێ دا ژی دەربارێ وی دا ب سەدەما کو “دخوازیت کین و نەفرەتێ ناڤا خەلکی دا پەیدا بکەت” دۆز ھات ڤەکرن.
د 7ێ ئادارێ رۆژا دوشەمبێ دا ژی دادگەھێ بێیی کو سزا بهێتە تانەکرن دەربارێ ئیبراھیم گوچلو دا 10 مەھ سزایێ زیندانیکرنێ بڕی.
بریارا زیندانیکرنا ئیبراھیم گوچلو دێ بۆ دادگەھا بلندا ب ناڤێ “یارگتای” هێتە شاندن و ئەگەر دادگەھا بلند ژی بریارێ ئەرێ بکەت دێ ئیبراھیم گوچلویێ تەمەن 73 سال کەڤیتە زیندانێ.
ئیبراھیم گوچلو ژ بۆ کوردستان24ێ دا زانین کو وی د دەما دادگەهێ دا ب 11 رووپەلان پاراستنا خوە کریە و وی گۆتیە دادگەھێ کو “ئەڤ دادگەھە نەیا مەشرووعە و یاسایێن داگیرکەریێ جێبەجێ دکەت.”
گوچلو دا زانین کو ل سەر ڤان گۆتنێن وی ژی دادوەری دەربارێ وی دا “بانگا تاوانێ کریە و گۆتیە ئەڤ گۆتنێن ئیبراھیم گوچلو تاوانن”. ئەڤ یەک دهێتە وێ واتەیێ کو ژ دۆزا کو ئیبراھیم گوچلو سزا خواریە دۆزەک دی دێ دەرکەڤیت.
ئیبراھیم گوچلو 73 سالییە و ژ بەر مژارێن کورد و کوردستانێ نێزیکی 6 سالان د زیندانان دا مایە.
