تەڤگەرا دەمۆکراتیکا کوردستانێ ب هەلکەفتا 8ێ ئادارێ، رۆژا جیهانی یا ژنێ داخویانیەک بەلاڤ کر و ئەڤ رۆژە پیرۆز کر.
داخویانیا تەدەکە-تەڤگەرێ وهایە:
8ێ ئادارێ رۆژا ژنێن جیھانێ پیرۆز بیت!
8ێ ئادارێ، سەمبۆل و نیشانا رۆژا تەکۆشینا ژنێن جیھانێیە. 8ێ ئادارا 1857ێ د ژییانا ژنێن ئەمەریکایێ و ژنێن جیھانێ دا رۆژەک تایبەتمەندە. وێ رۆژێ ل ئەیالەتا نەیوویۆرکێ 40 ھەزار ژنێن کارکەر بەشداری گرەڤا مافێ وەکھەڤییێ بوون. ل ھمبەری ڤێ گرەڤێ دەستھلاتدارێن ئەمەریکایێ توندوتیژی بکارئانی. دەرییێن کارگەھێ ب سەر ژنان دا گرتن و ئاگر بەردان کارگەھێ. د ڤێ کۆمکوژییا ژنان دا 129 ژنان ژییانا خوە ژ دەست دان. ب ڤێ مناسەبەتێ، د سالا 1910ێ دا، د “کۆنفەرانسا ژنێن سۆسیالیستیێن جیھانی”دا ب پێشنییارا ئەنداما پارتییا سۆسیال دەمۆکراتانیا ئەلمانیایێ کلارا زەتکین ڤە، 8ێ ئادارێ وەک رۆژا ژنێن جیھانی ھاتە قەبوولکرن. ھەروەھا ئەڤ رۆژە ژ ئالییێ نەتەوەیێن یەکبوویی ژی ھاتە قەبوولکرن و ژ بۆ تەڤایا جیھانێ پیرۆزکرنا ڤێ رۆژێ مەشرووع و فەرمی بوو.
ژ وێ رۆژێ ھەتا ئیرۆ، سالڤەگەرا ڤێ رۆژێ، وەک رۆژەک تایبەتمەند، ل دژی نەھەقی و زۆردارییا ل سەر ژنێ و ژ بۆ وەکھەڤییا ژن و مێران کو دو جنسێن د جڤاکی دا بھەڤرا دژین، دهێتە پیرۆزکرن. ئیرۆ دێ ل تەڤایا جیھانێ ب دەنگ و رەنگێن جودا ئەڤ رۆژە شیرۆڤە بیت و هێتە پیرۆزکرن.
ھەر جڤات ڤێ رۆژێ ب رەنگ و دەنگێن خوە پیرۆز دکەت. پیرۆزکرنا 8ێ ئادارێ ژ بۆ ژنا کورد نە تەنێ وەک رۆژا ژنێ پیرۆز دبیت. لەورا تەکۆشینا ژنا کوردیا ژ بۆ مافێ خوە، د تەکۆشینا دژی داگیرکەرییێ یا ژ بۆ وەلاتەکێ سەربخوە، ملەتەکی ئازاد و جڤاتەکە دەمۆکراتیک دا بوویە یەک تەکۆشین. د ڤێ تەکۆشینێ دا رۆلا ژنا کورد بریاردێرە.
د سالێن داوین دا، قەھرەمانی و بەرخوەدانا ژنا کورد، بنگەھێ تەکۆشینا ژ بۆ بدەستخستنا مافێ ژنێ د جڤاکا کورد دا مەشرووع، دادوەر و رەوا کرییە. ل سەر ڤی بنگەھی، تەڤگەرا کوردستانی، وەکھەڤییا ژن و مێران د تەکۆشینا ئازادییێ دا دەولەمەندتر دکەت.
ژنا کورد، نە تەنێ وەک ژن، لێ ھەروەھا وەک ژنا کورد، وەک دایک، د پلان و پرۆژەیێن داگیرکەران یێن ژ بۆ ئاسیمیلاسیۆن و تونەکرنا کوردان دا بوویە ئارمانجا سەرەکی. ئیرۆ ژنا کورد، وەک جینسییەتەک بندەست و وەک بەشەکی ژ جڤاکێ کورد، ب توندی، دەستدرێژی و نەھەقییان ڤە روو ب روویە. د کۆمکوژییان دا، د دەما شەرێ جیھانێیێ یەکەم دا، د پرۆژەیا تەھجیرا «ئیتتیحاد و تەراقیپەروەر» دا، د پلانێ کەمالیستان یا چاکسازیێن شەرقێ یا تونەکرنا کوردان دا، د سەرھلدانێن کوردستانێ دا، ل ھەلپچەیێ، د ئەنفالێ دا، ل عەفرینێ و کۆبانێ و دیلگرتن و فرۆتنا ژنێن کوردێن ئەزدی، ل بازارێن دەولەتێن مسلمان دا و ئیرۆ ل رۆژھەلاتێ کوردستانێ دا، ژنا کورد ب کۆمکوژییان ڤە روو ب روو بوویە و ئەڤ دەستدرێژی و نەھەقی مخابن ئیرۆ ژی ب ھەمان ستراتەژییێ بەردەوامە.
داگیرکەران بەری ھەرکەسی خواستنە ژنا کورد ژ ناسنامەیا وێ دوور بخن، زمانێ وێ قەدەغە بکەن، کەسایەتییا وێ بچووک بکەن و وێ بکەنە ترک، عەرەب یان ژی فارس. لێ ژنا کورد، ھەر ل بەر خوە دایە و ناسنامەیا خوە پاراستییە.
د فۆرمگرتنا ژیانا جڤاکییا کوردان دا، د تەمسیلییا جڤاتێ دا، د دەزگەھێن بریاروەرگرتنێ دا، پێویستە ژن ببیتە خوەدی رۆل و ب ئەرک و واتەیێن خوە رابیت. سەمبۆلا ئازادییا ژنا کورد، د تەکۆشینا ژ بۆ ئازادییا کوردستانێ دا دبیتە خوەدی ناسنامە و دبیتە خوەدی باندۆر.
تەدەکە-تەڤگەر، ڤێ رۆژا ژنێن جیھانێ، 8ێ ئادارێ کو وەک رۆژا وەکھەڤییێ، ئازادییا ژنێ و توندرەوییا دژی ژنێیە، ھەلوەستا ژنا کوردیا ژ بۆ خوەبوونا خوە پیرۆز دکەت. تەدەکە-تەڤگەر، د تەکۆشینا خوە دا، رۆلا ژنا کورد پێشەنگ دبینیت. تەدەکە-تەڤگەر، ب ھشمەندییا نەتەوەیی و ب خەباتا ژ بۆ ئاڤاکرنا جڤاتەک دەمۆکراتیک، رێکخستنا ژنێ و گەشکرنا مافێ ژنێ وەک تەمیناتا پێشەرۆژا نەتەوەیا کورد و جڤاتا ئازاد و دەمۆکراتیک دنرخینیت.
تەکۆشینا ژنا کوردیا ژ بۆ وەکھەڤی و ئازادییا کوردستانێ، گرنتیا سەرکەفتنا تەڤگەرا کوردستانییە. ئەم رۆژا 8ێ ئادارێ، ل ژنا کورد و تەڤایا ژنێن جیھانێ پیرۆز دکەین!
8/3/2022
تەڤگەرا دەمۆکراتیکا کوردستانێ
تەدەکە-تەڤگەر
