31 رۆژ ل سەر رەڤاندنا رۆژنامەڤان «سەبری فەخری» نووچەگەھانێ ئازادیا رۆژئاڤایێ کوردستانێ، ئارک تیڤی و رێباز نیوس، ھەروەھا ھەردو رۆژنامەڤان «دارا عەبدۆ و ئەحمەد سۆفی» کو ئەو ژی نووچەگیھانێن ئارک و رێباز نیوسن، دەرباس دبن، ھەردو رۆژنامەڤانێن داویێ ژ دەما رەڤاندنا وان کو بەریا 17 رۆژان ھاتنە رەڤاندن، دانگوباسێن وان ھاتنە برین.
د 19ێ سوباتا 2022یێ دا چەکدارێن پەیەدێ رۆژنامەڤان «دارا عەبدۆ» ژ باژارێ «حەسەکێ» ھەروەھا «ئەحمەد سۆفی» ژ گوندێ «بانە قەسرێ» یێ سەر ب باژارێ «دێرکێ» یێ رۆژئاڤایێ کوردستانێ ڤە رەڤاندن. ھەروەھا رۆژنامەڤان سەبری فەخری کو ژ 5ێ مەھا بووری ژ باژارێ قامشلۆ ب تۆمەتێن دوور ژ راستیێ رەڤاند، ھەرسێ رۆژنامەڤان ئەندامێن پارتیا دەمۆکراتا کوردستان – سووریا پەدەکە-سێ نە.
چاڤدێر تەکەز دکەن کو مەبەست ژ کریارێن رەڤاندنا رۆژنامەڤان و قرکرنا چالاکڤانان و ژناڤبرنا ژیانا سیاسی ئەوە کو پەیەدە ب تەنا خوە د قادێ دا بمینیت و راستیان ڤەشێریت، «در. ئەحمەد شەوقییە» ژ وان کەسایە کو دبینیت رەوشا رۆژنامەگەریێ ل رۆژئاڤایێ کوردستانێ پر خەرابە.
ژ ئالیێ خوە ڤە رۆژنامەڤان «ئاشتی تیشی» ژ بۆ «ARKtv» دا زانین کو بەهرا پتر یا بنکرنێن د دەرحەق مافێن رۆژانامەڤان و رۆژنامەگەریێ ل سووریێ، ل دەڤەرێن د بن دەستێ پەیەدێ دا ھاتنە ئەنجامدان. ناڤبووری بانگ ل پەیەدێ کر کو دڤێت د زووترین دەم دا چارەنڤیسا رۆژنامەڤانێن رەڤاندی دیار بکەت.
ژ بلی رۆژنامەڤانان ب دەھان ژ خەباتکار د زیندانێن پەیەدێ دز نە دیارن کو «عەبدولغەفار محەمەد» ئەندامێ ئەنجوومەنا ھەرێمی د خوەجھیا شەھید« نەسرەدین برھک» دا کو د 21ێ نیسانا 2021ێ دا ھاتیە رەڤاندن، تا نھا چ ئاگاھی ل سەر وان تونە نە.
ئەڤ یەک د دەمەکێ دا دهێت کو حەتا نها چ زانیاری ل سەر لیستەیا ئەنەکەسێ یا ناڤێن رەڤاندیان پێشکێشی فەرمانداریا قەسەدێ کری نەهاتینە زانین، ناڤێن د لیستەیێ دا ئەڤەنە:
1- سەرکردە بەھزاد دۆرسن، ئەندامێ پۆلیتبیرۆیا پارتیا دەمۆکراتا کوردستان-سووریا- د 24ێ جۆتمەھا 2012ێ ل گوندەوراێ دێرکێ ھاتیە رەڤاندن.
2- چالاکڤان نیدال عۆسمان – د 24ێ جۆتمەھا 2012ێ ل گوندەوراێ دێرکێ ھاتیە رەڤاندن.
3- پارێزەر ئدریس عەلۆ-ئەندامێ رێخستنا عەفرینێ یا پارتیا دەمۆکراتا کوردستان-سووریا د 8ێ مژدارا 2011ێ ل عەفرینێ ھاتیە رەڤاندن.
4- ئەحمەد سیدۆ- ئەندامێ رێخستنا عەفرینێ یا پارتیا دەمۆکراتا کوردستان-سووریا د 9ێ جۆتمەھا 2013ێ ل تاخا شێخ مەقسوودا حەلەبێ ھاتیە رەڤاندن.
5- فووئاد ئبراھیم-ئەندامێ خوەجھیا دێرکێ یا ئەنەکەسێ د 2یێ ئادارا 2017ێ ل گوندەوراێ دێرکێ ھاتیە رەڤاندن.
6- چالاکڤان ئەمیر حامد-ئەندامێ رێخستنا سۆز یا جوانێن کورد د 11 چلەیا 2014ێ ل دربێسیێ ھاتیە رەڤاندن
7- جەمیل بابێ عادل، د 13ێ تیرمەھا 2012ێ ل قامشلۆ ھاتیە رەڤاندن.
تەڤی کو دانووستاندن د ناڤبەرا ئەنەکەسێ و پەیەنەکێ دا دەست پێ کرنە و دیارکرنا چارەنڤیسا گرتی و رەڤاندیان مەرجەکێ سەرەکییە ل جەم ئەنەکەسێ ژ بۆ سەرخستنا دانووستاندنان لێ رێڤەبەریا پەیەدێ وی مەرجی پاشگوھ دکەت و تا نھا ل سەر نەدیارکرنا چارەنڤیسا گرتیان و کریارێن رەڤاندنێ رژدە.
ئارک تیڤی
