31 سال ب سەر سەرھلدان و رزگاربوونا باژارێن خانەقین و ئاکرێ یێن باشوورێ کوردستانێ ژ دەستێ رێژیما بەعسی یا ئیراقێ دەرباس دبن.
ئیرۆ 12 ئادارێیە و سی و یەکەمین سالڤەگەرا سەرھلدانا دەڤەرێن ئاکرێ، خانەقین، مەخموور و بەردەرەشێ ل دژی رێژیما بەعسی یا ئیراقێیە.
گەلێ کوردستانێ رۆژا 12 ئادارا سالا 1991ێ ل خانەقین، مەخموور و ئاکرێ ل دژی رێژیما سەرکوتکەریا بەعسی سەری ھلدان و ب جان و خوینا خوە وار و وەلاتێ خوە رزگار کرن.
وێ رۆژێ ژ بلی رزگارکرنا ئاکرێ، خانەقین و مەخموورێ، ناحیا جەلەولایا خانەقینێ و ناحیا بجیل یا ئاکرێ، باژارۆکێ بەردەرەش یێ دوھۆکێ، شێخان، دینارتێ و زێبار و چەمێ خازر و گەلەک گوند و دەڤەرێن دن گھیشتن ئازادیا خوە.
