ئه‌مه‌ریكا ب دوور نابینیت ئیرانێ ب هێرشا سه‌ر هه‌ولێرێ خواستییه تۆلا كوشتنا فه‌رماندارێن سپایێ پاسداران یێن ل سووریێ هاتنه ئارمانج گرتن ڤه‌كه‌ت.
چەند بەرپرسێن ئه‌مه‌ریكی دبێژن، ئەو هێرشا مووشەکی یا ل سەر کۆنسولخانەیا وان یا ل هەولێرێ، ژ ئالیێ ئیرانێ ڤە هاتییە ئەنجام دان و ب دوور نابینن كو ژ بۆی تۆلڤه‌كرنا كوشتنا دو فه‌رماندارێن سپایێ پاسداران ل سووریێ هاتبیته كرن.
چەند بەرپرسێن ئه‌مه‌ریكی ژ رۆژنامەیا وول ستریت جۆرنال راگه‌هاندن، ئەو مووشەکێن کو ئیرۆ یەکشەمبێ ئاراستەیی هەرێما کوردستانێ هاتنە کرن و ل نێزیکی ئاڤاهیا کۆنسولخانەیا نوو یا ئه‌مه‌ریكایێ کەتنە خوارێ، ژ ئالیێ ئیرانێ ڤە هاتنە ئاراستە کرن.
ئەو بەرپرسێن ئه‌مه‌ریكی دبێژن: چ ژ وان مووشەکان ب بەر ئاڤاهییا کۆنسولخانەیێ نەکەتنە و چ کارمەندەکی کۆنسولخانەیێ ژی زیان نەدیتیە.
بەرپرسێن ئه‌مه‌ریكی ئاماژە ب وێ ژی کرنە، ئەو هەتا نها پشتراست نینن کا ئارمانجا سەرەکی یا هێرشێ کو دەر و چ بوویە و لێکۆلینا ل سەر بوویەرێ ژی تەمام نەبوویە.
هەر د دەواما ئاخافتنا خوە دە بەرپرسێن ئه‌مه‌ریكی دبێژن: دبیت ئەو هێرشا مووشەکی کارڤەدانەک بیت ل هەمبەر وێ هێرشا ئەسمانی یا ئیسرائیلێ کو رۆژا دوشەمبا بۆری ل سووریێ پێكهاتییه و د ئەنجامێ دا 2 ئەندامێن سپایێ پاسداران هاتنه کوشتن.
وەزارەتا دەرڤە یا ئه‌مه‌ریكایێ ژی د داخویانیەکێ دا هێرش شەرمەزار کر و راگهاند، «حکوومەتا ئیراقێ و حکوومەتا هەرێما کوردستانێ دەست ب لێکۆلینێ کرنە».
ئیرۆ یەکشەمبێ 13ی ئادارا 2022ێ ب مووشەکان هێرشی هەولێرێ هات کرن و هندەک ژ ئەوان مووشەکان ل نێزیکی جهێن نشتەجیهبوونا خەلکێ کەتن و زیانێن دارایی ژی ب چەند خانی و ئاڤاهییان کەتییه.
