پێشمه‌رگه گه‌هشتن گوندێ «ئامارا» یێ ئۆجه‌لان!!
رێخستنا په‌كه‌كێ ئیرۆ جاره‌كا دی ل سه‌ر لڤ و ته‌ڤگه‌رێن هێزا پێشمه‌رگه‌هان دره‌وێن بێ واته به‌لاڤ كرن و د مه‌دیایا خوه دا گۆت كو «پێشمه‌رگه هاتییه بانكێ و پیربلا ژ بۆ كو پێشیێ ل گه‌ریلایان بگریت»!!
هێزێن پێشمه‌رگه‌هان یێن باشوورێ كوردستانێ، د چارچووڤه‌یا لڤ و ته‌ڤگه‌رێن خوه یێن رۆژانه دا كو ژ هێلا وه‌زاره‌تا پێشمه‌رگه ڤه دهێن پلان كرن، ئیرۆ ده‌وریه ل نێزی گوندێن بانكێ و پیربلا و هه‌رێمێن ده‌ردوور ئه‌نجام دا نه، ل سه‌ر ڤێ ده‌وریێ، رێخستنا په‌كه‌كێ نرخاندن كرییه و د مه‌دیایا خوه دا دیسا دره‌وێن بێ واته به‌لاڤ كرنه.
مه‌دیایا فه‌رمی یا په‌كه‌كێ گۆتییه: «هێزێن په‌ده‌كێ ل گەل دەهان زریپۆشان سەرێ سپێدێ ژ بۆ ئۆپەراسیۆنێ دەرباسی حه‌فته‌نینێ بوون».
هه‌روه‌ها گۆتییه: «بالکێشە کو جهێ هێزێن په‌ده‌كێ دخوازن لێ ب جهـ ببن ئەو جهه‌نه کو هێزێن گەریلا چالاکیێن ب باندۆر ل دژی دەولەتا ترک یا داگیرکەر دکەن، په‌ده‌كه ب ڤێ هەولدانێ دخوازیت رێ ل هێزێن گەریلا بگریت»!!.
قه‌ی پێشمه‌رگه دخوازه ل گوندێ ئاپۆ ب جهـ ببیت؟!
مه‌دیا په‌كه‌كێ وه‌ها باس ل هێزا پێشمه‌رگه‌هان كرییه هه‌ر وه‌كه پێشمه‌رگه‌هان ده‌وریه ل گوندێ «ئامارا» یێ ئۆجه‌لان، ل ناڤچه‌یا خه‌لفه‌تێ یێ پارێزگه‌ها رهایێ یێ باكورێ كوردستانێ ئه‌نجام داییه!!
هه‌روه‌ها ب ئاوایه‌كی وه‌ها ناڤێ پێشمه‌رگه‌هان ئانییه زمان كو ئه‌و وه‌كه هێزا په‌ده‌كێ نیشان دا نه.
په‌كه‌كه ب ڤان نووچه و دره‌وێن خوه یێن بێ واته، هه‌ول دده‌ت توهمه‌تان ژ بۆی پێشمه‌رگه‌هان كو ته‌كانه هێزا ده‌ستووری و مه‌شرووعه ل هه‌رێما كوردستانێ، چێبكه‌ت، هه‌ول دده‌ت ببێژیت كو ئه‌ڤ پێشمه‌رگه‌نه هاتنه و دخوازن رێ ل گه‌ریلایان بگرن، ل ده‌مه‌كی په‌كه‌كێ گوندێ رێبه‌رێ خوه یێ زیندان كری و ته‌ڤاهییا باكورێ كوردستانێ بۆ تركان هشتییه و هاتییه ل چیایێ باشوور پالڤه‌دایه و هه‌ر رۆژ گونده‌كێ باشوور پێشكێشی ده‌وله‌تا ترك دكه‌ت.
بالكێشه هه‌ر ده‌را په‌كه‌كێ چالاكیێن ب باندۆر لێ ئه‌نجام دان، ئه‌و ده‌ر دكه‌ڤیته ده‌ستێ تركێ داگیركه‌ر، یان دبیته مه‌یدانا شه‌ر و دهێته چۆل كرن!!
په‌كه‌كێ د نووچه‌یا خوه دا گۆتییه: «جهێ كو پێشمه‌رگه دخوازه لێ ب جهـ ببیت، گه‌ریلا چالاكیێن ب باندۆر ل وێرێ ل دژی ده‌وله‌تا ترك ئه‌نجام دده‌ن»!! لێ به‌لێ وه‌لاتیێن گوندێن بانكێ و پیربلا و هه‌رێمێن ده‌ردوور هه‌موو دزانن كو هه‌گه‌ر چالاكیێن ب باندۆر ل وێرێ هاتبان ئه‌نجام دان، هه‌ر رۆژ گونده‌كێ ده‌ڤه‌رێ ژ به‌ر «به‌رخوه‌دانا ساخته» یا په‌كه‌كێ نه‌دهاتن چۆل كرن.
وه‌لاتیێن هه‌رێمێ دزانن كو لڤ و ته‌ڤگه‌را پێشمه‌رگه‌هان ژ بۆی وێ یه كو گوندێن مایی یێن پارێزگه‌هییا دهۆكێ زێده‌تر نه‌كه‌ڤن ژێر ده‌ستێ ئارتێشا ترك و ئێدی نه‌یێن چۆل كرن، ژ به‌ر كو پێشمه‌رگه باش دزانیت هه‌ر ده‌را په‌كه‌كێ به‌رخوه‌دانا خوه و چالاكیێن خوه یێن ب باندۆر لێ گه‌ش كربن، ئه‌و ده‌ر د ناڤا 2 هه‌تا 3 رۆژان دا ژ بۆ ئارتێشا ترك مایه و ئارتێشا ترك تێدا ب جهـ بوویه.
ل داویێ ژی وه‌لاتیێن گوندێن بانكێ، پیربلا و هه‌رێمێن ده‌ردوور پێویسته ڤێ ژ په‌كه‌كێ بپرسن:
قه‌ی ئه‌ڤ 43 ساله پێشمه‌رگه‌هان رێ ل به‌رخوه‌دانا وه گرتییه كو هه‌تا نها وه 43 مه‌ترێن خاكا باكورێ كوردستانێ رزگار نه‌كرنه؟
قه‌ی پێشمه‌رگه‌هان رێ ل وه گرتییه كو گوندێ رێبه‌رێ وه ئامارا جه‌ندرمه تێدا بجهـ ببن؟
هه‌ر كورده‌ك دزانیت ئه‌ڤه 43 سالن هه‌ر ده‌را په‌كه‌كه كه‌تبیته تێدا، ئارتێشا ترك ل وێرێ ب جهـ بوویه، ئه‌ڤ یاریا «گرووپا ئه‌نقه‌رێ» ژ مێژه یه ژ بۆ هه‌ر كورده‌كی وه‌كه چاڤێ رۆژێ ئاشكرا و زه‌لال بوویه.
