تەڤگەرا جڤاکا دەمۆکراتیک ب بۆنەیا 32یەمین سالڤەگەرا کۆمکوژیا حەلەبجێ دا داخویانیەک نڤیسکی بەلاڤ کر و قوربانێن کۆمکوژیێ ببیرانی.
داخویانیا تەدەکە-تەڤگەر وەھایە:
جینۆسایدا ب بێھنا سێڤا پێکھاتی، حەلەبچە!
33 سال بەرێ د 16ێ ئادارا 1988ێ دا، د رۆژەکا بوھارێ دا، ب گازا مرنێ یا بێھنا سێڤان بەربەلاڤ دکر، ل حەلەبچەیێ بەشەک ژ ملەتێ کورد ب کۆمکوژییێ ڤە روو ب روو بوو. ڤێ ئێریشا کۆمکوژییێ یا ب چەکێن کیمیاوی، وەک کۆمکوژییا حەلەبچەیێ ب ناڤ بوو.
د کۆمکوژییا حەلەبچەیێ دا، 5 ھەزارکەسان ژییانا خوە ژ دەست دان. نێزی 10 ھەزار کەسان بریندار بوون و ب ھەزاران کەس ھەتانی نھا ژی نەخوەشن. ڤێ کۆمکوژیێ ل پاش خوە، قێرین و ھەوارا زارۆکێن کو دگۆتن: “دایێ بێھنا سێڤا دهێت!” ھیشت.
ل گۆر لێکۆلینێن نەتەوەیێن یەکبوویی، سەدام حوسێن گازا خەردەلێ ب کارانی بوو. د ناڤا شەرێ ئیران و ئیراقێ دا، کوردستانییان حەلەبچە خستە دەستێن خوە. ئەڤ کۆمکوژییا بێبەخت پشتی 48 دەمژمێران ژ بدەستخستنا حەلەبچەیێ پێک ھات.
پشتی بکارئانینا چەکێن ئەتۆمی ل ژاپۆنێ، د دیرۆکێ دا کۆمکوژییا ب چەکێن کیمیاوی یا ھەری مەزن بوو. د 2010ێ دا، ژ ئالییێ مەحکەمەیا جەزایی یا ئیراقێ ڤە، ئەڤ کۆمکوژیە وەکە جینۆساید ھاتە قەبوول کرن.
جەنەرالێ سەدام حوسێن عەلی کیمیاوی (عەلی حەسەن ئەلمەجید) ژی وەکە گونەھکارێ ڤێ جینۆسایدێ ھاتە سێدارەدان. ب جینۆسایدا حەلەبچەیێ و بوویەرێن ئەنفالێ ڤە داگیرکەرێن کوردستانێ تونەکرنا ملەتێ کورد کربوون ئارمانج. ژخوە ئەڤ جینۆسایدە وەکە بەشەک ژ ئەنفالێ ب ناڤ دبیت.
تەڤگەرا کوردستانی، ژ بۆ ل تەڤایا دنیایێ ئەڤ کۆمکوژیە وەکە جینۆساید بهێتە قەبوولکرن خەباتێ دکەت. ھەرچقاسی ئەڤ کارەساتە، ژ ئالییێن چەند وەلاتان وەک جینۆساید ھاتبە قەبوولکرن ژی ئەڤە تێرێ ناکەت و دڤێت د ڤی واری دا خەبات بەردەوام بیت.
برینێن جینۆسایدا حەلەبچەیێ، ھینێ ژی نەھاتنە کەواندن. حەلەبچە برینەک د لاشێ ملەتێ کورد دایە. کەواندنا ڤێ برینێ، تەنێ ب ئاڤاکرنا کوردستانا سەربخوە مومکنە. ژ بۆ ئاڤاکرنا کوردستانا سەربخوە ژی پێدڤییا یەکیتی و ھەڤکارییا سییاسی، لەشکەری و ئابۆرییا باشوورێ کوردستانێ و تەڤایا تەڤگەرا رزگاریخوازییا نەتەوەیی ھەیە.
حەلەبچە نایێ ژبیر کرن!
ئەم وەکە تەدەکە-تەڤگەر، کۆمکوژی و جینۆسایدا داگیرکەرێن کوردستانێ شەرمەزار دکەین!
روورەشی دێ ھەر پارا وان بیت!
بژی کورد و بژی کوردستان!
تەڤگەرا دەمۆکراتیکا کوردستانێ
تەدەکە-تەڤگەر
