ل عه‌فرینێ 650 هەزار عه‌ره‌ب و ترکمەنێن هاوردە هاتنە بجهکرن
چار سال د سەر داگیركرنا عه‌فرینێ را دەرباس دبن، ژ وێ دەمێ هەتا نها ب ئاوایەکی پلانکری ژ ئالیێ ترکیێ ڤە دەمۆگرافیا عه‌فرینێ تێ گوهەرتن و 650 هەزار عه‌ره‌ب و ترکمەنێن هاوردە لێ هاتنە بجهکرن.
ل ناڤەندا باژارێ عه‌فرینێ پشتی 4 سالان ژ داگیرکرنا عه‌فرینێ یا رۆژئاڤایێ کوردستانێ ژ ئالیێ ئارتێشا ترکیێ و چەکدارێن ئۆپۆزسیۆنا سووریێ ڤە، دەمۆگرافیایا وێ هەرێما کوردستانی کو رێژەیا کوردان لێ دەردۆرا 98% بوویە، ب تەمامی هاتیە گوهەتن.
ب سەدان هەزاران عه‌ره‌ب و ترکمەنێن هاوردە لێ هاتنە نشتەجیکرن و پێتری 60% ژ نشتەجیێن وێ یێن رەسەن هاتنە کۆچبەر کرن.
ل عه‌فرینێ گوهەرتنا دەمۆگرافیێ
ل گۆری زانیاریێن کو تۆرا مەدیایی یا رووداوێ ژ چەند چاڤکانیێن ژ هەرێما عەفرینێ وەرگرتنە، نها ل عه‌فرینێ:
650 هەزار عه‌ره‌ب و ترکمەن ل عه‌فرینێ هاتنە نشتەجیکرن.
250 هەزار تا 300 هەزار کورد ل هەرێما عه‌فرینێ مانە.
نها ژ سەدی 35 ژ نشتەجیێن کورد مانە.
100 هەزار کورد ل ناڤچەیا شەهبایێ کۆچبەرن.
5 کامپێن کۆچبەران ل شەهبایێ هەنە.
پارێزەرێ عه‌فرینی عەدنان موراد ژ تۆرا مەدیایی یا رووداوێ گۆت: رێژەیا گوهەرتنا دەمۆگرافیک ل هەموو گوند و باژارۆکان نە وەک هەڤە، لێ چارەسەری ئالیکارییا خەلکێ عه‌فرینێ ژ بۆ ڤەگەرێ یە.
پارێزەر عەدنان موراد «ل عه‌فرینێ دەمۆگرافی تێ گوهەرتن ب شەکلەکی پلان کری، لێ ب راستی هندەک گوند هەنە ژ سەدی سەد بوونە عه‌ره‌ب، ل هندەک گوندان سەدی 90 کورد ل سەر ئاخا خوە مانە، ل هندەک جهان ژی مالێن کو ڤالابوونە ژ سەدی سەد بوونە ترک و عه‌ره‌ب، ژ بەر وێ یەکێ خه‌لكێ مە یێ کو دکاریت ڤەگەریت سەر ئاخا خوە دێ كارن پلانا کو ژ بۆ گوهەرتنا دەمۆگرافیا عه‌فرینی هاتییە دانان بده‌نه سەکناندن».
پشتی داگیرکرنا عه‌فرینێ، دەردۆرا 300 هەزار عه‌فرینی ژ هەرێما خوە کۆچبەر ببوون، بەشەک ژ وان گه‌هشتن حەلەب، کۆبانی و جزیرێ، بەشەک ژی پەنابەری ترکیێ، باشوورێ کوردستانێ و ئەورۆپایێ بوون، لێ دەردۆرا 100 هەزار کۆچبەران ژی ل هەرێما شەهبایێ ل ناڤ کامپان یان ژی ل ناڤ گوند و باژارۆکێن ناڤچەیێ نیشتەجێ بووینه.
