پارتییا کارکەرێن کوردستانێ په‌كه‌كه، ب بەهانەیا بەشداربوونا جەژنا نەورۆزێ، پلان دکەت کو ب دەهان زارۆکێن باژارێ سلێمانیێ و دەردۆرا وێ برەڤینیت.
ل گۆری ئاگاهیێن هاتنە بدەستخستن، په‌كه‌كێ خەلکێ سلێمانیێ ژ بۆ پیرۆزکرنا نەورۆزێ گازی كرییه كو به‌شداری ئاهه‌نگێن ل چیایێ قەندیلێ ببن، په‌كه‌كێ د بانگا خوه دا بۆ خه‌لكێ سلێمانیێ كو ب رێیا رووپەل و حەسابێن ئالیگرێن خوە ل سۆسیال مه‌دیایێ و هه‌روه‌ها ب رێیا رێخستن و ئەندامێن خوە، بال كشاندییه سەر زارۆک و بچووکان كو بەشداری وان ئاهه‌نگان ببن یێن کو په‌كه‌كێ ل قەندیلێ رێخستینه، ب ئارمانجا رەڤاندن و تەڤلی کرنا وان د رەفێن گه‌ریلایان دا.
هەروه‌ها زانیاریێن کو ب دەست کەتنە تەکەز دکه‌ن، په‌كه‌كێ ئۆتۆبوس و ئۆتۆمبیل ئامادە کرنە و سلۆگان و ئالایێن رێخستنێ ل سەر دانانە، دا کو خەلکێ سلێمانیێ و دەردۆرا وێ ب مەبەستا بەشداربوونا جەژنا نەورۆزێ، ب تایبەت کەچ و کورێن بچووک دەرباسی قەندیلێ بكه‌ن.
د ڤێ دەربارێ دا، چالاکڤانا مافێن زارۆکان مونسرا لوقمان گۆت: «بکارئینانا زارۆکان ژ بۆ مەبەستێن سیاسی خەلەتە، ئەڤ یه‌ك پر جاران ژ ئالیێ پارتی و رێخستنێن تەرۆریست ڤە دهێته ئەنجامدان، میناک داعشێ ژی زارۆک د کریارێن توندوتیژیێ دا بکار ئیناینه».
چالاکڤانا مافێن زارۆکان بال کشاند سەر وێ یەکێ کو «راپۆرت هەنە کو په‌كه‌ك زارۆکان ژ بۆ ئارمانجێن سیاسی و لەشکەری بكار دئینیت و ئەڤ یەک د وارێ مافێن زارۆکان دا وەک تاوانەکا مەزن دهێته دیتن، ژ بەر کو مافێ زارۆکانە د ژینگەهەکا ساخلەم دا ب ئاشتی بژین، نە کو بهێنه لەشکەر کرن».
هەروه‌ها گۆت: «دڤێت هێزێن ئاساییشا سلێمانیێ رێ ل خاپاندنا زارۆکان ژ ئالیێ په‌كه‌كێ ڤە بگرن».
ژ ئالیێ خوە ڤە ئەندامێ جڤاتا گشتی یا تەڤگەرا گۆرانێ کەریم مەجید قاسم بۆ باسنیۆزێ راگه‌هاند: په‌كه‌كه رێخستنێن خوە ل باژارێ سلێمانیێ بەرفرەهتر کرینە و گۆت: «هه‌ر چه‌نده کو ئەز نزانم بۆچی په‌كه‌كێ خەلکێ سلێمانیێ ژ بۆ پیرۆزکرنا نەورۆزێ گازی كرینه قەندیلێ، لێ نابیت رێ ب ڤێ یەکێ بهێته دان و مافێ په‌كه‌كێ ژی نینە ل سلێمانیێ وەک کو وێ دڤێت تەڤبگەریت».
وەزارەتا دەرڤە یا ئه‌مەریکا، د راپۆرتا خوە یا داوین دا ل سەر لەشکەرکرنا زارۆکان ل جیهانێ، ل تیرمەها سالا بۆری راگه‌هاندبوو کو په‌كه‌كێ ب سەدان زارۆک ل شنگالێ وەک شەرڤانێن یەکینەیێن بەرخوەدانا شنگالێ چەکدار کرن و پاشێ ئەو شاندن چیایێ قەندیلێ ژ بۆ کو شەرێ ئارتێشا ترک پێ بكه‌ت.
د بەشەکێ دی یێ راپۆرتا وەزارەتا دەرڤە یا ئه‌مەریکایێ دا هاتییە: یەکینەیێن پاراستنا گەل یه‌په‌گه ژی ل سەر چەکدارکرنا کەچ و جوانان بەردەوامە، د راپۆرێ دا هات زێدەکرن کو هنده‌ك ژ وان زارۆكێن كو هاتینه چه‌كدار كرن د بن 12 سالیێ دا بوون.
پرۆتۆکۆلا پەیمانا مافێن زارۆکان ل سه‌ر هێزێن حکوومەتێن وه‌لاتان و کۆمێن چەکدار یێن ناڤدەولەتی قەدەغە دکەت کو زارۆکان بکار بینن و لەشکەر بکه‌ن و ئەڤ یەک ل گۆری پێناسەیا (یاسایا رۆمایێ) کو دادگەها تاوانان یا ناڤدەولەتی ئاڤا دکەت، وەک تاوانەکا شەر دهێته هه‌ژمارتن.
کۆمسیۆنا سەربخوە یا مافێن مرۆڤان ل هەرێما کوردستانێ ژی پێشتر راگه‌هاندبوو کو گەلەک گازنده ژ مالباتێن کو زارۆکێن وان ژ ئالیێ په‌كه‌كێ ڤە هاتینە رەڤاندن، گه‌هشتینە وان و ئاماژە ب وێ یەکێ ژی کربوو، کو هەتا نها ژی چارەنڤیسا وان کەسان نەدیارە.
