رێخستنا پهكهكێ، ل گهل ب داوی بوونا نهورۆزێ زهمینهسازییا شهرهكێ نوو ل باشوورێ كوردستانێ، تایبهت ل دهڤهرا بههدینان پلان دكهت، ب كورتی پهكهكه دێ عهسكهرێ داگیركهر كێشی هندهك گوند و ناڤچهیێن دی یێن بههدینان بكهت.
مهدیا پهكهكێ ئهڤرۆ هێرشا سهر باشوورێ كوردستانێ و پێشمهرگههان دهستپێكر و ژ بۆ ڤهشارتنا پیلانا خوه یا كو ل رۆژێن پێش مه دێ هێته بجهئینان، درهو و توهمهتا خوه یا ههر جار یا ب ناڤێ «تفاقا پهدهكێ و ئاكهپێ ل دژی پهكهكێ» بهلاڤ كرییه، مهدیا پهكهكێ هندهك وێنه و دیمهن یێن لڤ و تهڤگهرا پێشمهرگههان بهلاڤ كرینه و گۆتییه كو لڤ و تهڤگهرا پێشمهرگهی و ئارتێشا ترك ل ههرێمێن گهریلایان زێده بوونه.
چاڤكانیێن پێگهها «داركا مازی» ل باشوورێ كوردستانێ ئهشكهره كرن كو پهكهكه یا پیلانهكا خهتهر ژ بۆ دهڤهرا بههدینان ئاماده دكهت، ل گۆری وێ پیلانێ پهكهكه دێ عهسكهرێ ترك كێشی هندهك گوند و ناڤچهیێن دی كهت و ئهو دهر دێ بنه مهیدا شهر، وهك چاوا ل سالا رابووری بلنداهیێن خامتیری و دهردوورا باتووفێ و زنارا كێسته و گوندێ هرۆرێ و ههژمارهكا ناڤچهیێن دی ژ بۆتركیێ هێلاین.
ههروهها دهست نیشان كر، هێزا پێشمهرگههان ژ بۆ كو رێ ل بهر ڤێ پیلانا پهكهكێ بگریت لڤ و تهڤگهرا خوه دهست پێ كرییه، لهوما پهكهكه هاتییه و دبێژیت پهدهكه ل گهل ئارتێشا ترك كهتییه لڤ و تهڤگهرێ، یا راست پهكهكه ناخوازیت پێشمهرگه نێزیكی دهڤهرێن گهریلایان ببیت، دا كو ب دلێ خوه وان دهڤهرا یێك ب یێك ژ بۆ عهسكهرێ ترك چوول بكهت، لێ بهلێ ب چوونا پیشمهرگههان بۆ وان دهڤهران ئهڤ پیلانا پهكهكێ دهێته پووچ كرن.
پهكهكێ ژ سالا 2020ێ ل گۆری پیلانهكا دو ئالی یا ل گهل تركیێ، ب دههان ناڤچه و دهڤهرێن باشوور ژ بۆ تركیێ هێلان و كرنه مهیدانا شهر، پهكهكێ ئهڤ نهخشهرێ ب چار قۆناغان بجهئینا و ئیسال ژی دخوازیت بهردهوامیێ ب ڤێ پیلانێ بكهت و بهرخوهدانا خوه یا ساخته پتر نێزیكی گوند و باژارۆكان بكهت.
ل گۆری ئاگاهیێن كو ژ هێزا پێشمهرگههان هاتینه ستاندن، لڤ و تهڤگهرا هێزا پێشمهرگههان ل گۆری پلان و میكانزما رۆژانه یا وهزارهتا پێشمهرگه دهێنه ئهنجام دان، ئارمانج ژێ ئهوه كو چ دهڤهرێن دی یێن بههدینان نهبنه مهیدانا شهر و لهشكهرێ ترك نهكهڤیته تێدا.
رێخستنا پهكهكێ ههر رۆژ لڤ و تهڤگهرا گهریلایێن خوه دئێخیته ناڤا گوند و نێزیكی باژارۆكان، ئهڤ یێك ب مهبهست دهێته ئهنجام دان ژ بۆ كو شهر ژ خهتا سنۆر دهرباسی كووراهییا باشوور و گوندێن باشوور ببیت و ئهو گوند بهێنه ڤالان كرن، پهكهكه ب ڤی رهنگی رێ ژ بۆ ئارتێشا ترك خوهش دكهت.
پێشمهرگههێن كوردستانێ ژی ژ بۆ كو رێ ل پهكهكێ بگرن كو زێدهتر گوندێن باشوور نهكهته مهیدانا شهر، كهتنه لڤ و تهڤگهرێ و ئهڤ لڤ و تهڤگهرا پێشمهرگههان بوویه سهدهما عاجزبوونا پهكهكێ، ژ بهر كو پهكهكه باش دزانیت ب ههبوونا پێشمهرگههان ئهو نهشێت ڤێ پیلانا خوه بجهـ بینیت.
