سەرۆک مەسعوود بارزانی پەیامەک دەربارێ سڤکاتیکرنا ب مەرجەعیەتا بلندا ئیراقێ و شەوتاندنا بارەگەها پارتییا دەمۆکراتا کوردستانێ ل بەغدایێ بەلاڤ کر و راگه‌هاند، «سڤكاتیكرن ب پیرۆزی و هیمایێن بلند ب چ ئاوایەکی ناهێته قەبوولکرن و بنپێکرنا هێلێن سۆرە و گەلەک ب توندی وێ سڤکاتیێ شەرمەزار دکه‌ین».
سەرۆک بارزانی د پەیاما خوە دا دبێژیت: «سڤكاتیكرن ب پیرۆزی و هیمایێن بلند، ب چ ئاوایەکی ناهێته قەبوولکرن و بنپێکرنا هێلێن سۆرە. ئەم گەلەک ب توندی وێ سڤکاتیێ شەرمەزار دکه‌ین کو شەڤا بۆری ژ ئالیێ کەسەکی ڤە ب مەرجەعیەتێ هاتییە کرن».
سەرۆک بارزانی دبێژیت: «ئەڤ جورە رفتارا نەهێژا، چ پێوەندییا وێ ب گەلێ کوردستانێ و پارتییا دەمۆکراتا کوردستانێ ڤه نینە. کوردستان خوەدی کولتورا بلندا پێکڤەژیانێ یە و سڤكاتیكرن ب رەمز و پیرۆزیێن خەلکێ چ جاره‌كێ جهێ خوە د ناڤا کولتورا گەلێ کوردستانێ دا نەگرتییە و جهێ خوە ژی نابینیت».
سەرۆک بارزانی دیار دکەت: «گەلێ کوردستانێ رێز و پێزانینا وی یا مەزن ژ مەرجەعیەتێ هەیە و پێوەندیێن دیرۆکی و دۆستانی و هەڤسۆزییا د ناڤبەرا بارزانیێ نەمر و ئایەتوڵا حەکیم و شەهید سەدر دا، باشترین نیشانا ل سەر وێ یه‌كێ نە».
هەروه‌ها دیار کر ژی: «ئەو کەسێ کو سڤکاتی کرییە ژ ئالیێ یاسایێ ڤە هاتییە دەستەسەرکرن و سزایا تاوان و زێدەگاڤییا خوە دێ ده‌ت».
هەروه‌ها سەرۆک بارزانی د پەیاما خوە دا گۆت: «ئەم ب توندی شەوتاندنا بارەگەها پارتیا دەمۆکراتا کوردستانێ ل بەغدایێ شەرمەزار دکه‌ین کو ئەڤ جارا دویەمینە ژ ئالیێ کۆمەکا تێکدەر و شکەستخوار ڤە دهێته کرن، ئەڤ بەلگەیە ل سەر هەبوونا گرژی و نەبوونا ئارامی و ئەولەهیێ و د راستیێ دا، ئەڤ کۆم ژی ژ بلی خراپکاری و تێکدانێ، چ تشت ژ دەستێ وان نەهاتیە».
