حکوومەتا ئیراقێ ل سەر سینۆرێ د ناڤبەرا باشوور و رۆژئاڤایێ کوردستانێ یێ ل دەڤەرێن د بن دەستێ خوە دا، دیوارەکێ بەتۆن ئاڤا دکەت. زێرەڤانێن سینۆری دبێژن، کو ئارمانجا وان ئەوە رێ ل بەر دەرباسبوونا چەکدار و قاچاخچیان بگرن.
فەرماندارێ لیوایا 18 یا پاسەوانێن سینۆری یێن ئیراقێ ژ بۆ ئاژانسێن مەدیایی دیار کریە، ژ سالا 2021ێ ڤە پلانا پاراستن و بھێزکرنا سینۆران دەستپێ کریە و پشتی سەردانا سەرۆکوەزیرێ ئیراقێ وان ل سەر سینۆر دەست ب دانینا دیوارێن بەتۆن کریە.
بەری وێ ژی ل سەر خەندەقێن ب کووراھیا 3 مەتران و فرەھیا 3 مەترەیان ھاتبوون کۆلاندن و پشترا دەست ب دانینا تێلبەندان کرنە و کامێرایێن چاڤدێریێ ل سەر سینۆر دانینە.
ھەروھا ھات راگھاندن دیوارێ کو دێ ل سەر سینۆرێ د ناڤبەرا باشوور و رۆژئاڤایێ کوردستانێیێ ل ناڤچەیێن د بن دەستێ حکوومەتا ئیراقێ دا هێتە ئاڤاکرن، دێ 250 کیلۆمەتران درێژ، 3 مەتر و 75 سەنتیمەتران بلند بیت.
تەڤی کو 75 ژ سەدێ ژ دیواری ل سەر سینۆر هاتیە ئاڤاکرن تەمام بوویە و د دو مەھێن بهێت دا دێ ئاڤاکرنا دیوار ب تەمامی ب داوی هێت، لێ هەیا نها پەکەکە بێ هەلوەستە و د مەدیایا خوەدا ب چ رەنگا باس ناکەت.
پەکەکێ هەتتا یەک نووچە ل سەر ڤێ مژارێ پارڤە نەکریە و ئالیگر و کادرێن خوە ژ بۆی راوەستاندنا ئاڤاکرنا ڤی دیواری نەشاندنە سەر سنۆر، د دەمەکێ دا کو ئەگەر ئەڤە حکوومەتا هەرێما کوردستانێ بایە دا وەکە پێش ئێریشا داعشێ، دەما حکوومەتا هەرێما کوردستانێ دخواست د ناڤبەرا باشوور و رۆژئاڤا دا خەندەقان ژ بۆ پاراستنا باشوور ژ هێرشا داعشێ بکۆلیت لایەنگر و کادرێن خوە هنێریت و ئالۆزیان چێکەت.
ل سالا 2014ێ، پاش کو داعش ل سووریێ گەلەک ب هیز بووی، حکوومەتا هەرێما کوردستانێ ژ بۆی پاراستنا باشوور ژ ئێریشێن تەرۆریستێن داعشێ هندەک خەندەک د ناڤبەرا باشوور و رۆژئاڤایێ کوردستانێ دا کۆلان، لێ هەر د زوو دا ئەڤ کارێ حکوومەتا کوردستانێ ژ لایێ دوژمن و نەیارێن کوردستانێ یێن ناڤخوەیی و دەرڤە وەکو رەواتیدان ب دابەشکرنا کوردستانێ، رەواتی دان ب پەیمانا سایکس بیکۆ و خیانەتا ل گەلێ کورد هات پێناسە کرن. پەکەکێ تەڤ نڤیسکار و چالاکڤان و ئالیگرێن خوە ل دژی ڤێ یەک سەفەربەر کرن، ب تەڤ ئاوایان ل دژی خەندەکان سەکنین و راگهاند، “پارتی خیانەتێ دکەت”، “پارتی سنۆران د نێڤبەرا پارچەیێن کوردستانێ دا دروست دکەت”، “پارتی ب فەرمانا دەولەتێن داگیرکەر ڤێ یەکێ دکەت” و …..هتد. واتە پەکەکێ وەکو کارێن خوە یێن هەردەم ئارمانجا سەرەکی یا کۆلانا ڤان خەندەکان ل بیرا خەلکێ بر و ووسا ب وان دا زانین کو ئەڤە کارەکێ خراب و خیانەتا نیشتیمانی یە، لێ هەیا نها دەربارێ دیوارێ کو حکوومەتا ئیراقێ د ناڤبەرا باشوور و رۆژئاڤا دا ئاڤا دکەت بێدەنگە و هەتتا یەک داخویانی ژی ل دژی ڤی کارێ ئیراقێ پارڤە نەکریە.
