مەسروور بارزانی: ئێرشا مووشەکی یا ل سەر ھەولێرێ فشارا سیاسی بوو

masrour-barzani-erbil-emirate

سەرۆکوەزیرێ ھەرێما کوردستانێ «مەسروور بارزانی» راگھاند کو ئێریشا مووشەکی یا ئیرانێ بۆ سەر ھەولێرا پایتەخت، ب ئاڤاکرنا حکوومەتا نوویا ئیراقێ و پرسا بەرھەمانینا ئەنەرژیێ ل ھەرێما کوردستانێ ڤە گرێدایییە و داخواز کر کو لێکۆلینەکا ناڤدەولەتی دەربارێ بوویەرێ دا بهێتە کرن و ئالیێ ئیرانێ ژی سەردانا جھێ ئێرشێ بکەت.

سەرۆکوەزیرێ ھەرێما کوردستانێ مەسروور بارزانی ئیرۆ 29ێ ئادارا 2022یێ د چارچۆڤەیا لووتکەیا جیھانی یا حکوومەتان ل «دوبەیێ» د پانێلەکێ دا ئاخڤت.

مەسروور بارزانی دیار کر ھەرێما کوردستانێ ئەڤە دەمەک درێژە بوویە قوربانیا ئێریشێن گەلەک ئالیێن جودا و گۆت، “ئێریشا مووشەکییا ڤێ داویێ ل ھەولێرا پایتەخت، زەخت ل سەر پێکانینا ھکوومەتا نوویا ئیراقێ کریە کو نە ل گۆری ئیرادەیا کۆمارا ئیسلامی یا ئیرانێیە.”

سەرۆکوەزیرێ ھەرێما کوردستانێ گۆت ژی، “سەدەما دی یا ئێریشا مووشەکی ژی مژارا ئەنەرژیێ یە. ھەرێما کوردستانێ ھەول ددەت زێدەتر زەڤیێن پەترۆل و گازێ ببینیت و پێش بێخیت، ئەڤ یەک ژی نە د بەرژەوەندیا ئیرانێ دایە.”

د 13ێ ئادارا 2022یێ دا 12 مووشەکێن دوورئاڤێژ بەر ب باژارێ ھەولێرێ ڤە ھاتن ئاڤێتن و پشتی وێ ژی سپایێ پاسدارێن ئیرانێ بەرپرساتیا وێ ئێرشێ گرتبوو سەر خوە و راگھاندبوو، وێ ئێرشێ بارەگەھەکێ ئیسرایلێ کریە ئارمانج. لێ حکوومەتا ھەرێما کوردستانێ رەد کر کو چ بنگەھێن ئیسرایلێ ل ھەرێما کوردستانێ هەبن کو بکەتە ئارمانج.

مەسروور بارزانی د دەربارێ ئێرشا مووشەکی یا ل سەر ھەولێرێ دا دبێژیت، “بەهانەیێن ئێریشێ نە راستن و جھێ کو ھاتیە بۆمبەکرن مالا سەرمایەدارەکێیە. ئەم ل سەر تەقینان داخوازا لێکۆلینەکا ناڤدەولەتی دکەین و ئەم داخوازێ ژ ئالیێن ئیرانی ژی دکەین کو سەردانا جھێ ئێرشێ بکەن.

مەسەروور بارزانی گۆت، “پێناسەکرنا مەترسیێ ل گۆر جھەکێ دگوھەریت و مەترسیێن جودا ھەنە. ل ھەرێما مە گەلەک دەستوەردان ھەنە، ئەم نەھەقیێ دبینین و کارڤەدانەک ژی ھەیە، ئەڤە ژی رەوشێ مەترسیدار دکەت. “

پوستێن ھەمان بەش