پاسەوانێن سینۆری خالەکا ستراتەژیک ل سنۆرێ کانی ماسی دانا

ھێزەکا پاسەوانێن سینۆری، خالەکا ل کەلەھا «قومریێ» ل ناڤچەیا «کانی ماسێ» یا سەر ب پارێزگەھا دوھۆکێ ڤە دانا.

موختارێ گوندێ قومریێ عۆمەر کامل ژ بۆ K24ێ راگھاند، دەمەکە کەلا «قومریێ» بوویە مەیدانا شەرێ د ناڤبەرا چەکدارێن پەکەکێ و ھێزێن ئارتێشا ترکیێ دا و چەند جاران کەتیە بەر بۆمبەبارانێ، د ئەنجامێ دا ژی زیانەکا مەزن گەھشتیە وێ دەڤەرێ.

موختارێ گوندێ قومریێ دیار کر، دوھی نێزیکی 60 لەشکەرێن ژ ھێزا پاسەوانێن سنۆری یێن ئیراقێ ل سەر کەلەھێ ھاتنە بجھکرن.

عۆمەر کامل گۆت ژی، بریارە ئیرۆ چەند خالێن دی ژی ژ ئالیێ وێ ھێزێن ڤە ل دەڤەرێ بێنە دانین، ژ بۆ رێگری ل پێشکەتنێن ئارتێشا ترکیێ بهێتە کرن کو ژ بەر ھەبوونا پەکەکێ دەرباسی وێ دەڤەرێ بوونە.

ل گۆر زانیاریێن موختارێ گوندێ قومریێ، کەلەھا قومریێ ل سەر بلنداھیێن د ناڤبەرا باشوور و باکورێ کوردستانێ. کەلەھ بەری نێزیک 200 سالان د سەردەما میرێن کوردان دا ھاتیە دروستکرن.