رێخستنا په‌كه‌كێ ئیرۆ جه‌زا كرنا 9 عه‌سكه‌رێن ترك ل هه‌رێما خاكوركێ یا باشوورێ كوردستانێ راگهاند و بێی كو ئه‌شكه‌ره بكه كانێ ئه‌و عه‌سكه‌ر هاتنه كوشتن یا بریندار بوونه.
رێخستنا په‌كه‌كێ ئیرۆ رۆژا شه‌می 2/4/2022ێ ل مه‌دیایا خوه ئاماره‌ك پارڤه‌كرییه و گۆتییه: ژ 27 ئادارا ئیسالێ، گه‌ریلایان 9 عه‌سكه‌رێن ترك ل هه‌رێما خاكوركێ یا باشوورێ كوردستانێ جه‌زا كرنه.
ده‌ست نیشان كر، ئه‌ڤ عه‌سكه‌ر ل 27، 29 و 30 ئادارێ ل دۆربه‌را گرێ لێلیكان هاتنه جه‌زا كرن.
هێژای گۆتنێ یه، ئارتێشا ترك تو ئاگاهی ل ده‌ربارێ وه‌نداهیێن خوه نه‌دانه و نووچه‌یا جه‌زا كرنا عه‌سكه‌ران ژبلی مه‌دیایا په‌كه‌كێ ل تو سازیێن سه‌ربخوه نه‌هاتییه پشتراست كرن.
په‌یڤا جه‌زا كرن، ژ هێلا مه‌دیا په‌كه‌كێ ڤه ژ بۆی وه‌نداهیێن عه‌سكه‌رێ ترك تێ بكارئانین، لێ به‌لێ په‌كه‌كه ئه‌شكه‌ره نابێژه كانێ چاره‌نڤیسا یێن كو تێن جه‌زا كرنه كوشتنه یان بریندار بوونه.
