کۆنفەرانسا تەڤگەرا دەمۆکراتیکا کوردستانێ (تەدەکە-تەڤگەرێ) یا ئەورۆپایێ د بن ئالایا کوردستانێ دا، ب سروودا نەتەوەیی و راوەستانا رێزگرتنێ ژ بۆ پاکرەوانێن کوردستانێ، د 26ێ ئادارا 2022یێ دا ل پاریسێ ھاتە ل دارخستن.
کۆنفەرانسا پاریسێ د چارچووڤەیا نامیلکەیا تەدەکە-تەڤگەرێ دا، ب ئاوایەکێ گشتی ل سەر رەوشا تەڤگەرا نەتەوەیی و دەمۆکراتیک یا ھەر چار پارچەیێن کوردستانێ و ب تایبەتی ل سەر رەوشا باکورێ کوردستانێ و ھەروەھا ل سەر خەبات، رەوش و پرسگرێکێن کوردێن ل ئەورۆپایێ راوەستییا.
کۆنفەرانسێ ئاماژە پێکر کو کوردستان د پێڤاژۆیەکا ھەستییار دا دەرباس دبیت و پێدڤییە تەڤگەرا رزگاریخوازییا نەتەوەیی، ل گۆری ڤێ ھەستیارێ تەڤبگەریت. کۆنفەرانسێ دیار کر کو چارەسەرییا پرسگرێکا ملەتێ کورد و کوردستانێ د ئاڤاکرنا ھەڤکاری، یەکتی و یەکرێزییا پارتی، رێخستن و تەڤگەرێن نەتەوەیی و دەمۆکراتیک دا دەرباس دبیت. پێدڤیە ھێزێن نەتەوەیی، رەوشەنبیر و وەلاتپارێزێن کوردستانی، ب سییاسەتەکا ھەڤبەش و ب ھەماھەنگییەکا نەتەوەیی ب بەرپرسییارییێن خوە رابن. د ڤی واری دا، نامیلکەیا «تەدەکە-تەڤگەرێ» خوەدی چارچووڤە و نەرینێن گەلەک دەولەمەندە. د ڤێ چارچووڤەیێ دا، کۆنفەرانسێ بال کشاند سەر گرینگییا خەبات و ھەولدانێن سێ پارتی و تەڤگەرێن باکورێ کوردستنێ؛ ئانگۆ ھەڤکارییا د ناڤ بەینا «PAK، PSK و TDK-TEVGER» دا. کۆنفەرانسا پاریسێ دییار کر کو رێخستانا تەدەکە-تەڤگەر یا ئەورۆپایێ، ب ھەر ئاوایی پشتگرییێ ددەتە ڤێ خەباتێ و د ڤی واری دا چ بکەڤیتە سەر ملێن وێ دێ ئەنجامدەت.
کۆنفەرانسا پاریسێ ب ئاوایەکێ بەرفرەھ ل سەر رەوشا سیاسی، جڤاکی، چاندی و رێخستنی یا کوردێن ئەورۆپایێ راوەستییا و بال کشاندە سەر گرینگییا رۆلا خەباتا کوردێن ئەورۆپایێ و دیاسپۆرا کوردی. قادا خەبات و تەکۆشینا رزگاریخوازییا نەتەوەیی یا ئەساسی ناڤا وەلاتی یە. لێ تەڤگەرێن نەتەوەیی و دەمۆکراتیکیێن کوردێن دەرڤەی وەلاتی، ب تەجرووبە و خەباتێن خوەیێن جھرەنگ دکارن د گەشکرنا تەڤگەرا رزگاریخوازییا نەتەوەیی یا کوردستانێ دا رۆلەک ئەرێنی بگێرن. لەوما ژی پەیوەندی و کۆردیناسیۆنا ناڤ وان گەلەکا گرینگە.
د کۆنفەراسێ دا، ل سەر پرس و پرسگرێکێن مالبات، زارۆک و جوانێن کوردێن ل ئەورۆپایێ ھاتە راوەستاندن و ژ بۆ خەبات و چالاکییێن د ڤی واری دا پێشنییار و رێیێن چارەسەرییێ ھاتن پێشنیارکرن.
د کۆنفەرانسێ دا ھاتە دیار کرن کو پێدڤیە رێخستنا «تەدەکە-تەڤگەرێ» یا ئەورۆپایێ، ب دۆست، ھۆگر و کەسایەتییێن سیاسی و وەلاتپەروەر؛ ب دەزگەھێن نەتەوەیی و کولتوری پێوەندییێن خوە خورتر و گەشتر بکەت. پیدڤیە رێخستنا «تەدەکە-تەڤگەرێ» یا ئەورۆپایێ نە وەکە رێخستنەک کلاسیک تەڤبگەریت و خەباتا خوە یا سیاسی، دەمۆکراتیک و کولتوری تەنێ ب ئەندامێن خوە ڤە سینۆردار نەکەت؛ ھەروەھا دڤێت ئەو ب دۆست و ھۆگرێن خوە ڤە ژی کار و خەباتێن جھرەنگ بکەت و نەرین و پێشنییارێن وان بدەتە بەر چاڤان.
کۆنفەرانسا پاریسێ، ل سەر مژار و رەوشا دییاسپۆرا کورد ژی راوەستییا و مژارا دییاسپۆرا کورد وەکە مژارەکا نەتەوەیی نرخاند. کۆنفەرانسێ خەبات و ھەولدانێن د ڤی واری دا ھاتنە کرن ب ھوورگلی نرخاندن و بال کشاند سەر کێمانی، شاشی و خەلەتییێن د ڤێ پێڤاژۆیێ دا ھاتنە کرن. تەدەکە-تەڤگەر، پڕسەریتییا دیاسپۆرا کوردی راست نابینیت و د ڤێ باوەرییێ دایە کو دڤێت ھەموو ئالی د ڤی واری دا ب وەزیفە و بەرپرسیارییێن خوەیێن نەتەوەیی رابن. ئەم وەکە رێخستنا تەدەکە-تەڤگەرێ یا ئەورۆپایێ ئامادەنە کو د ڤی واری دا چ کار و خزمەتەک بکەڤیتە سەر ملێن مە، ژ گرووپ پەرەستییێ دوور و ب بەرپرسییارییەک نەتەوەیی پێک بینن. کۆمیتەیا ئەورۆپایێ یا «تدک-تەڤگەرێ» ژ بۆ دییاسپۆرا کوردی د بنێ بانەکی ھەڤبەش، نەتەوەیی و کوردستانی دا بهێتە جڤاندن؛ ھەماھەنگی و یەکرێزییا دییاسپۆرا کوردی پێک بهێت، دێ بخوازیت ب ھەموو ھێز و کەسایەتییێن پەیوەندیدار پێوەندییان دانیت و دێ ھەول دەت کو ب ئاوایەکێ ھەڤبەش چارەسەرییەکێ ژ ڤێ بەلاڤبوون و پڕسەریتییێ ببینیت.
کۆنفەرانسا «تەدەکە-تەڤگەرێ» یا ئەورۆپایێ، ب ھلبژارتنا کۆمیتەیێن پێویست و وەرگرتنا ھندەک بریارێن گرینگ ب داوی ھات.
بژی خەبات و تێکۆشینا ژ بۆ وەلاتەکێ سەربخوە، ملەتەکی ئازاد و جڤاتەک دەمۆکراتیک!
تەڤگەرا دەمۆکراتیکا کوردستانێ (تەدەکە-تەڤگەر)
کۆمیتەیا ئەورۆپایێ
