«رۆژ نیوز» کو ئۆرگانا مەدیایی یا پەکەکێ یە و ل سلێمانیێ وەشانێ دکەت، دوھی ل سەر حەسابا خوەیا مەدیایا جڤاکی یا ترکیێ نووچەیەک بەلاڤ کر و تێ دا ئاخافتنێن پارلامەنتەرێ «یەنەکێ» «عۆسمان سێدەری» بەرۆڤاژی کرن.
پارلامەنتەرێ «یەنەکێ» «عۆسمان سێدەری» ل سەر حەسابا مەدیایا جڤاکی یا «رۆژنیوز-تورکی» گۆت، “ئەم بانگ ل رایا گشتی دکەین کو ل دژی ڤێ پلانا داگیرکەریێ بسەکنن و پەدەکێ راوەستینن.” د ڤیدیۆیا «رۆژ نیوزێ» دا کو ب ڤێ سەرناڤێ ل سەر حەسابا خوەیا مەدیایا جڤاکی بەلاڤ کری دا، دهێتە دیتن کو «عۆسمان سێدەری» ھەڤۆکەکا وەھا ب کار نەئانیە، بەرۆڤاژی ڤێ یەکێ گۆتیە، “ھەموو سەرۆکێن کوردان و کورد نەفرەتان ل شەرێ ناڤخوەیی دکەن. “
عۆسمان سێدەری د ئاخافتنا خوە دا ناڤێ هیچ حیزبەکێ نابێژیت و بانگا یەکرێزیا کوردان دکەت. ھەروەھا «سێدەری» د ئاخافتنا خوە دا دبێژیت ” شەر د ناڤبەرا کوردان دا نینە”، ب تایبەتی د نھا دا.
تشتا بالکێش ئەوە کو «عۆسمان سێدەری» ئیستیفزازێن بەردەوام یێن مەدیایی و نووچەیێن سەختە یێن «رۆژ نیوزێ» رەخنە دکەت. «سێدەری» د ئاخافتنا خوە دا گۆت، “د ناڤبەرا کوردان دا هیچ شەرەکێ چەکداری و دژمناتی نینە. تەنێ د مەدیایێ دا شەر ھەیە. دڤێ ئەڤە ژی بهێتە راوەستاندن.”
ژ بەر کو«رۆژنیوز»ێ دزانی گەلێ باشوور دێ ب سۆرانی و کورمانجی نووچەیان بشۆپینن د ڤان دو بەشان دا نووچە ب دەرەو ڤە بەلاڤ نەکر. وەکی دی، ژ بەر کو مرۆڤ تەنێ تایتلێ نووچەیان دخوینن، ل سەر مەدیایا جڤاکی سەرناڤەک کو دەرەو تێ دا بوو ھاتە وەشاندن.
مەدیا و تۆرا مەدیایا جڤاکی یا کو «پەکەکە» وەک ئاموورەکێ شەرێ تایبەت ل دژی کوردان ب کار تینیت، ب ئارمانجا بەلاڤکرنا دژمناتیێ د ناڤ کوردان دا و هاندانا وان ل دژی هەڤدو، نووچەیێن ساختە و دەرەو بەلاڤ دکەت. گەلەک ژ ڤان راپۆران راستیێ نیشان نادەن.
ب تایبەتی «رۆژ نیوز» ب گەلەک دەرەو و نووچەیێن ساختە ل سەر باشوورێ کوردستانێ شەرەکێ تایبەت ل دژی باشوورێ کوردستانێ و پارچەیێن دن ئەنجام ددەت.
