د 5ێ نیسانێ، رۆژا پارێزەران دا بارۆیا «دیاربەکرێ» ب بەشداریا پارێزەران ل بەر ئاڤاھیا دادێ یا «دیاربەکرێ» جڤینەکا چاپەمەنیێ ل دار خست. د جڤینێ دا ھات ئاماژەکرن کو مافێ پاراستنێ یێ کو ژ ئالیێ پارێزەران ڤە دهێتە کرن پیرۆزە و ناهێت قەبوولکرن دەما جێبەجێکرنا کارێ خوە دا، پارێزەر راستی زەخت و ئێریشان وەرن.
5ێ نیسانێ ل ترکیایێ وەک رۆژا پارێزەران دهێتە پیرۆزکرن. د 5ێ نیسانێ دا سەندیکا ژی بالێ دکێشن سەر پرسگرێکێن پارێزەران و د ڤێ چارچۆڤەیێ دا سەندیکایا پاریزەرێن دیاربەکرێ جڤینەکا چاپەمەنیێ ل دار خست.
سەرۆکێ سەندیکایا پارێزەران ل دیاربەکرێ «ناھید ئەرەن» ئاماژە کر کو ئەو ب خەمگینی بێی «تاھیر ئەلچی» پێشوازیا رۆژا پارێزەران دکەن کو هێژ ژی دۆزا «تاھیر ئەلچی» نەھاتیا رۆنیکرن.
«ناھید ئەرەن» ئاماژە کر کو مافێ پاراستنێ پیرۆزە و ناهێتە قەبوولکرن کو ئەڤ مافە بهێتە ئاستەنگکرن.
«ناھید ئەرەن» بال کشاند کو پرسا کورد ب شەری چارەسەر نابیت و چارەسەری ژی چێکرنا دەستۆرەکێ بنگەهین یێ نوو و دەمۆکراتیکە کو ھەموو ئالیان ل خوە بگریت.
سەرۆکا ناڤەندا مافێن پارێزەران یا سەندیکایا پارێزەرێن «دیاربەکر» «شەڤال یلدز» ژی ئانی زمان کو پارێزر د دەما جێبەجێکرنا کارێ خوە دا راستی ئێریشان و ئاستەنگیان تێن و ئەڤ یەک ل پێشیا پێشکەتنا یاسایی ئاستەنگە.
