پەکەکە ل بەندا ئیشارەتەکا ئیرانێیە

لێکۆلینڤانەکێ کورد ل رۆژئاڤایێ کوردستانێ دبێژیت، پەکەکە ل بەندا ئیشارەتەکا پاسدارێن ئیرانێیە دا کو ل ھەرێما کوردستانێ خرابکاریێ ئەنجام بدەت.

لێکۆلینڤان و نڤیسکارێ کورد ل رۆژئاڤایێ کوردستانێ، «عەبدولرەحمان گولۆ» ل سەر فەیسبۆکا خوە گۆتیە، ئیران ناخوازیت پۆستا سەرۆکاتیا حکوومەتێ بکەڤیتە دەستێ پارتیێن «ئیتارا تەنسیق» و ھەر وەھا ناخوازیت بەرھەم سالح دیسا ببیتە سەرکۆمارێ ئیراقێ.

عەبدولرەحمان گولۆ ھەر وەھا گۆتیە، ئیران ھم سەرۆکاتیا پارلەمەنتۆیا ئیراقێ دخوازیت ھم سەرۆکاتیا حکوومەتێ ھم ژی سەرۆکاتیا دادوەریا ئیراقێ. ئەڤە ژی ژ بەر سەرکەفتنا هەڤپەیمانیا سێ ئالی یا «سەدر، پەدەکێ و سیادە» بجھ ناهێت.

وی لێکۆلینڤانێ کورد بەحسا وێ یەکێ ژی کریە کو ئیران تەنێ دێ د حالەتەکێ دا دەست ژ ئیراقێ بەردەت ئەو ژی ئەوە کو ئیراقێ وێران بکەت.

عەبدولرەحمان گولۆ ل سەر پەکەکێ ژی گۆتیە، پەکەکە ل ھەرێما کوردستانێ رۆلەکا خراب دگێریت و ل بەندا ئیشارەتەکا پاسدارێن ئیرانێ یە دا کو خرابکاریێ ل ھەرێما کوردستانێ ئەنجام بدەت. حەشدا شەعبی ژی مینا پەکەکێ ل بەندا ئیشارەتەکا پاسدارانە دا کو ل ئیراقێ خرابکاریێ ئەنجام بدەت.