مامۆستایێ زانکۆیا «فرات» کو وێنەیێ رێبەرێ گەلێ کورد «مەلا مستەفا بارزانی» د ئەکوانتێ خوەیێ تایبەت د تویتەرێ دا بەلاڤ کربوو و ل سەر نڤیساندبوو “بژی کوردستان” ژ ئالیێ دادگەھێ ڤە بریارا بێتەوانیا وی دەرکەت و ئەو تۆمەتێن ژ بۆ وی ھاتبوون ئیدیعا کرن ژی ھاتن رەد کرن.
مامۆستایێ زانکۆیا «فرات» « حەفزوللا کوتوم» چەند مەھان بەری نھا د ئەکوانتێ خوە یێ تایبەت د تویتەرێ دا وێنەیەکێ رێبەرێ کورد «مەلا مستەفا بارزانی» دانابوو و نڤیساندبوو “بژی کوردستان” لێ دۆزگەرێ گشتی یێ «ئەلعەزیزێ» ب تۆمەتا پرۆپاگاندایا تەرۆرێ دۆز ل ھەمبەر وی ڤەکربوو و ئەو ژ مامۆستاتیا زانکۆیێ ھاتە دوورخستن. پشترا ژی داخوازا 5 سال سزایێ گرتیگەھێ ژ بۆ وی ھاتبوو خواستن. لێ ئەو هەول راستی بەرتەکان ھاتن.
ل گۆر ئاژانسێن ترکیێ دادگەھێ بێتاوانیا «حەفزوللا کوتوم» راگەھاند و دیار کر، تشتا کو «کوتوم» بەلاڤ کریە دکەڤیتە چارچۆڤەیا ئازادیا رامانێ و ژ بەر وێ ژی پێویستی ب چ سزایەکێ ناکەت. لێ دەربارێ ڤەگەراندنا وی بۆ سەر سەر کارێ مامۆستاتیا زانکۆیێ دا چ بریارەک نەدا.
«حەفزوللا کوتوم» د گرتە ڤیدیۆیەکێ دا رەخنە ل بەشەک ژ چاپەمەنی و دادگەھێن ترکیێ گرت، ژ بەر دەما کو بەحسا کوردستانێ دهێتە کرن، وێ یەکێ وەک تاوان پێناسە دکەن.
کوتوم دیار کر: “یێ کو نزانیت کوردستان ل کودەرێیە بلا بچیت ژ «ئەنقەرێ» بپرسیت و ئەو دێ بێژن هەوە کا کوردستان ل کودەرێیە. ب تایبەت هەرن ل ھەموو بەلگەیێن ئارشیڤا کۆمارا ترکیێ بنێرن، دێ ل وێ دەرێ ژی ژ بۆ هەوە ئاشکەرا بیت کا کوردستان کودەرە.”
دۆزگەرێ گشتییێ «ئەلعەزیزێ» ژی ب فەرمی ل ھەمبەر بریارا دادگەھێ رابوویە و راگەھاندیە، نابیت «کوتوم» نەهێتە جەزا کرن، ژ بەر کو ب وان نڤیسان پشتەڤانیێ ل تەرۆرێ دکەت و ب ئاشکەرا داخواز جوداخوازیێ دکەت.
