ل باژارێ قامشلۆ ئالۆزی د ناڤبەرا ھێزێن ئاسایشا پەیەدێ و رێژیما سووریێ دا دەرکەت و ھێزێن ئاسایشێ ریا فرۆکخانەیا قامشلۆ گرت.
رەوانگەھا سووری یا مافێن مرۆڤان بەلاڤ کر، ژ بەر دۆرپێچا کو ھێزێن رێژیما سووریێ دانایە سەر تاخێن کوردان ل «حەلەبێ» (ئەشرەفیێ و شێخ مەقسوود) ئالۆزی ل باژارێ قامشلۆ دەرکەت و ھێزێن ئاسایشێ ریا فرۆکخانەیا قامشلۆ گرت و دەستێ خوە دانی سەر فرنەیا «ئەل-بەس» ل قامشلۆ.
ل گۆر رەوانگەھێ، ھێزێن ئاساییشێ فرنەیا «ئەل-بەس» دۆرپێچ کریە، دا کو زەختێ ل حکوومەتا سووریێ بکەن کو رێ بدەت سۆتەمەنی، گاز و مادەیێن خوارنێ دەرباسی تاخێن «شێخ مەقسوود و ئەشرەفیێ» ببن.
ئەڤ ئالۆزی پشتی وێ یەکێ دهێت کو فرقەیا چارەما رێژیما سووریێ ژ رۆژا 13ێ ئادارا بۆری ڤە خالێن پشکنینێ داناینە و رێ نادەن مادەیێن خوارنێ و ب تایبەتی «ئار» دەرباسی تاخێن «شێخ مەقسوود و ئەشرەفیێ» ببن.
خەلکێ تاخێن «ئەشرەفیێ و شێخ مەقسوود» دوھی ل نێزیکی نەخوەشخانەیا یاسینا ل «شێخ مەقسوود» دەرکەتن خوەپێشاندانێ و نەرازیبوونا خوە نیشان دان و داخوازا راکرنا دۆرپێچا ل سەر تاخێن «شێخ مەقسوود و ئەشرەفیێ» کرن.
تاخێن شێخ مەقسوود و ئەشرەفیێ ل حەلەبێ وەک تاخێن کوردان تێن ناسکرن و د دەستێ یەکینەیێن پاراستنا گەل (یەپەگێ) دانە، ئەڤ تاخە راستی شەرت و مەرجێن مرۆڤی یێن دژوار تێن، ژ بەر کێمبوونا گەلەک جورەیێن خوارنێ کو نرخێ کیسەک نان ژ 1500 لیرا بوویە 4000 لیرە.
ل گۆر رەوانگەھا سووری یا مافێن مرۆڤان، دۆرپێچا ل سەر «ئەشرەفیێ و شێخ مەقسوود» ژ ئالیێ ھێزێن رێژیما سووریێ، مەترسیێ تێخیت سەر 200 ھەزار نشتەجھێن وان ھەر دو تاخان.
