پۆلیسێ کو ل شرنەخێ ب ترۆمبێلا خوە ل پارێزەر سەرکان کاراکاش دابوو ھات گرتن

پۆلیسێ کو ترۆمبێل ل سەرۆکێ ناڤەندا مافێن پارێزەران یا نڤیسینگەها شرنەخێ «سەرکان کاراکاش» دابوو، ھات گرتن.

ل باژارێ شرنەخێ یێ باکورێ کوردستانێ کۆمیسەرێ ب ناڤێ «س.ە.» کو ل رێڤەبەریا ئەولەھیا شرنەخێ کار دکە دوھ (10/4/2022) ب ترۆمبێلا خوە ل سەرۆکێ ناڤەندا مافێن پارێزەران «سەرکان کاراکاش» دابوو و ئەو بریندار کر.

کۆمیسەرێ کو ب ترۆمبێلا خوە ل پارێزەر «سەرکان کاراکاش» دابوو ھاتبوو دەستەسەرکرن و د ئیفادەیا خوە دا گۆتبوو، “رەوشا منا دەروونی نە باش بوو، دەنگەکێ د گوھێ من دا گۆت ھەرە ل وی بدە.”

پشتی کو ئیفادەیێن کۆمیسەر «س.ە.» ل دادگەها شرنەخێ هاتی وەرگرتن ژ بۆ گرتنا وی ئەو ژ بۆ دادگەھا سزایێ سولحێ ھات شاندن. ئەڤ کۆمیسەرە ژ ئالیێ دادگەریا سزایا سولحێ ڤە ب ئیدیعایا “ھەولدانا کوشتنێ” ھات گرتن.

ھات دیارکرن کو پارێزەر «سەرکان کاراکاش» دەما کو دخوەست ترۆمبێلا خوە ل کێلەکا رێیەکێ ل باژارێ شرنەخێ تەعمیر بکە، س.ە. ب ترۆمبێلا خوە ل وی دایە و ئەو بریندار کریە.

ھات دەستنیشانکرن کو پارێزەر «سەرکان کاراکاش» ژ بەر برین و شکەستنا ھەستیان بۆ نەخوەشخانەیێ ھاتبوو ڤەگوھەستن و پشتی نەشتەرگەریەکا 2-3 دەمژمێران نھا رەوشا وی باشە.