دادگەھا بلندا ترکیایێ جھ نەدا 4 پارتیێن کوردی
دادگەھا بلندا ترکیایێ ناڤێ پارتیێن کوردی یێن کو ناڤێ کوردستانێ تێ دا جھ دگرن سانسوور کرن.
دادگەھا بلندا ترکیایێ ھەژمارا پارتیێن سیاسی و ئەندامێن وان ب لیستەیەکێ ئاشکەرا کر. لێ د لیستەیێ دا جھ نەدا 4 پارتیێن کوردی یێن کو ناڤێ کوردستانێ تێ دا جھ دگرن.
پارتیێن کو پەیڤا کوردستانێ د ناڤێ وان دا جھ دگرن ئەڤەنە: پارتیا دەمۆکراتا کوردستان – ترکیا (پەدەکە-ت) پارتیا سۆسیالیستا کوردستانێ (پەسەکە) پارتیا ئازادیا کوردستانێ (پاک) پارتیا کۆمونیستا کوردستانێ (کەکەپە) د لیستەیێ دا 121 پارتی ھەنە. رێزا 63 و 64ێ ڤالا ھاتیە ھشتن، کو دڤایابوو د رێزا 63یەمین دا پارتیا ئازادیا کوردستانێ و د رێزا 64ەمین دا ژی پارتیا سۆسیالیستا کوردستانێ (پەسەکە) ھەبیت.
دۆزا گرتنا پارتیێن کوردی ژ بەر بێژەیا کوردستانێ یا د ناڤێ ڤان پارتیان دا، ل دادگەھا دەستۆرا بنگەهین یا ترکیایێ دۆزا گرتنا ڤان پارتیان بەردەوام دکەت.
دادگەھا دەستۆرا بنگەهین یا ترکیایێ دبێژیت ئەگەر ئەڤ پارتیە بێژەیا کوردستانێ ژ ناڤێ پارتیا خوە دەرنەخن دێ هێنە گرتن. لێ پارتیێن کو ب گرتنێ روو ب روو مانە، دبێژن ئەو چ جاران ناڤێ کوردستانێ ژ ناڤا پارتیا خوە دەرناخن و ئەو دێ ھەول دەن کو ناڤێ کوردستانێ و نرخێن وێ ب ئاوایەکێ یاسایی مسۆگەر بکەن.
ژ سالا 1963یێ ھەتا نھا ل ترکیایێ 28 پارتیێن سیاسی یان ب ھنجەتێن ئۆلداریێ و یان ژی ب ھنجەتێن جوداخوازی و پارچەکرنا ترکیایێ ژ ئالیێ دادگەھا دەستۆرا بنگەهین ڤە ھاتنە گرتن. ژ ڤان ٧ پارتیێن سیاسی یێن کوردان بوون.
