ل گۆر گۆتنێن نوونەرێن جۆتکارێن سینۆرێ قەزا «دبس» و ناحیەیێن دەردۆرا وێ ئیسال ژ بەر عەرەبکرنا ناڤچەیێ و بارینا کێما بارانان جۆتکارێن ناڤچەیێ گەلەک زیان دیتینە.
د ڤێ دەربارێ دا نوونەرێ جۆتکارێن سینۆرێ قەزا «دبس» محەمەد ئیسمایل ژ بۆ «باس نیوزێ» راگەھاند، دیارە جۆتکارێن سنۆرێ قەزا «دبس» ب گشتی رەوشا وان خرابە. ژ بەر کو بەشەک ژ وان ئەردێن وان ژ ئالیێ عەرەبێن ھاوردە ڤە ھاتنە داگیرکرن و بەشەک دن ژی ئیسال ژ بەر ھشکەسالی و کێم بارینا بارانان زیان دیتینە و تشتێن دێمی ژی نەما، ئانکو نە گەنم و نە جەھ دەرنەکەت و ھشک بوویە. ژ بەر باران گەلەک کێم باری و ئەوێن کو پشت ب ئاڤێن بیرێ ژی گرێدانە ژ بەر ئەلەکتریک کێمە دیسا نەکارین ئاڤدانیێ بکەن. دڤێ پرانی مووەلیدەیان پێبکەن و دەما مووەلیدە ژی پێ بکەن پێویستی ب سۆتەمەنیێ یە و سۆتەمەنی ژی گەلەک گرانە.
نوونەرێ جۆتکارێن «دبس» گۆت، رەوشا ئەولەھیا ناڤچەیێ ژی خرابە و بەشەک ژ جۆتکاران ئیسال دەخل و دان نەچاندن.
قەزا دبسێ 45 کیلۆمەترەیان ل باکورێ رۆژئاڤایێ باژارێ کەرکووکێ یە و سەر ب پارێزگەھا کەرکووکێ یە.
