ئه‌مه‌ریكا هەول ددەت کو دانوستاندنێن د ناڤبەرا ئه‌نه‌كه‌سێ و په‌یه‌نه‌كێ جاره‌كا دی ده‌ست پێ بكه‌ن، لێ هەتا نها چ سۆز د ناڤبەرا هەردو ئالییان دا نەهاتییە دان.
رۆژا 5ێ نیسانا ئیسالێ، شاندەیێ ئه‌مه‌ریكی سەره‌دانا ئەنجوومەنا نشتیمانی یا کوردی ل سووریێ ئه‌نه‌كه‌سێ ل قامشلۆ کرییە و ل گەل سەرۆکاتییا وێ ئەگەرا دەستپێکرنا دانوستاندنان ل گەل پارتیێن یەکێتییا نیشتمانی یا کوردی په‌یه‌نه‌كێ گۆتووبێژ کرییە.
ل گۆری رووداوێ رۆژا 25ێ ئادارێ جڤینەك د ناڤبەرا شاندەکێ ئەنه‌که‌سێ و فەرماندارێ هێزێن سووریا دەمۆکراتیک، مازلووم عەبدی و نوونەرێ ئه‌مه‌ریكا هاتبوو ل دارخستن.
د جڤینێ دا، شاندا ئەنکس داخوازا جیبجیکرنا کاخەزا گارانتیان کربوو و داخوازا ئازادکرنا کەسێن کو ڤێ داویێ هاتبوون گرتن کربوو دا کو رێ ل پێش ڤەگەرا دانوستاندنان بێ خوەشکرن.
د جڤینێ دا، مازلووم عەبدی سۆز دابوو کو هەر سێ مەدیاکارێن کو ڤێ داویێ هاتبوون گرتن بهێنه ئازادکرن، لێ ئەو سۆز هەتا نها نەهاتییه جیبجیکرن.
د جڤینا 5ێ نیسانێ دا، ل گەل شاندەیێ ئه‌مه‌ریكی، ئەنه‌کسێ جارەکا دی تەکەزی ل سەر هەلوەستا خوە کرییە و ئه‌شکەرە ژی کر کو هەتا نها چ سۆز ژ بۆ دەستپێکرنا دانوستانان نەهاتییە دانین.
دیالۆگا کوردی – کوردی
ب دەستپێشخەریا ئه‌مه‌ریكایێ، دانووستاندنێن ئالیێن کوردی ل رۆژاڤایێ کوردستانێ، د ناڤبەرا ئەنه‌کسێ و په‌یه‌نه‌كێ دا دەستپێ کربوون.
د گەرا یەکەم دە، هەردو ئالی ل 16ێ خزیرانێ گه‌هشتن نه‌رینەکا سیاسی یا هەڤبەش و تێگه‌هشتنه‌كا سەرەتایی و رۆژا 17 خزیرانا 2020 ل حەسەکێ، د داخویانیەکا هەڤبەش دە رێکەفتنا خوە راگه‌هاندن.
هەردو ئالیان د گەرا یەکەم دا رێككه‌فتن، کو رێکكەفتنا دهۆکێ یا جۆتمەها 2014ێ ببیته بنگەها سەرەکی یا دانوستاندنێن ناڤبەرا وان دا دەربارێ دەستهه‌لات، رێڤەبەری، پاراستن و بەرەڤانیێ دا.
پاش ل 2ێ تەباخا 2020ێ قۆناخا دویەم یا دانوستاندنێن کوردی-کوردی ل رۆژئاڤایێ کوردستانێ دەستپێ کربوو و پشتی چەند مەهان ئەنه‌که‌سه و په‌یه‌نه‌كه ل سەر لێڤەگەرەکا سیاسی و مژارێن ئیداری و رێڤەبەریێ رێككه‌فتن، لێ ناڤەرۆک و وورده‌كاریێن وێ نه‌هاتبوون ئاشکەرە کرن.
دانوستاندنێن هەردو ئالییان د قۆناخا سێیەم دا هاتنە راوەستاندن و د وان دەمێن داویێ دا، د ناڤبەرا ئه‌نه‌كه‌سێ و پارتیێن سەر ب رێڤەبەرییا خوەسەر ڤه ئالۆزی زێدەتر بووینە.
