یەنەکە ژ پەکەکێ نیگەرانە و ب توندی گەفان لێ دکەت
ژ بەر زێدەبوونا چالاکیێن پەکەکێ ل پارێزگەھا سلێمانیێ، یەنەکە ژ پەکەکێ نیگەرانە ژ بەر وێ ژی گەفا وێ یەکێ ل پەکەکێ دکەت کو دێ رێکەفتنا خوەیا سالا 2018ێ لگەل ترکیێ دا ئەکتیف کەت.
ل گۆری ئاگاھیێن «باس نیوزێ»، ئەڤە دەمەکە پەیوەندیێن یەنەکێ و پەکەکێ ئالۆز بوونە و یەنەکە ژ پەکەکێ نیگەرانە. ژ بەر کو یەنەکە د وێ باوەریێ دایە پەکەکە خەلکێ دەڤەرا سلێمانیێ هان ددەت بۆ خوەپێشاندانا ل دژی وێ و وان چەکدار دکەت و وان هان ددەت دا کو بارەگەھێن پارتیێن سیاسی و سازیێن حکوومەتێ یێن ل دەڤەرا سلێمانیێ بشەوتینن.
ل گۆر ئاگاھیێن کو کەتنە دەستێ «باس نیوزێ»، یەنەکێ ھشیاری دایە پەکەکێ کو ئەگەر دەست ژ سلێمانیێ نەکشینیت و ل سەر ئالۆزکرنا رەوشا وێ دەڤەرێ بەردەوام بیت، دێ رێکەفتنا خوە یا سالا 2018ێ ل گەل ترکیێ دا ئەکتیف کەت.
پشتی رێکەفتنا سالا 2018ێ یا یەنەکێ لگەل ترکیێ دا، رێڤەبەریا یەنەکێ تەڤاھیا سازی و بارەگەھێن پەکەکێ ل وێ دەڤەرێ گرتن و چەندین سەرکردەیێن پەکەکێ یێن مینا «دیار غەریب، جەمیل ئامەد و دەمھات عەگید» ژی ب دەستێ ترکیێ دان کوشتن.
د چارچۆڤەیا وان پەیام و ھشیاریان دا ئەندامێ پۆلیتبورۆیا یەنەکێ «سەعدی پیرە» ئیرۆ سەردانا کۆنسولخانەیا ترکیێ ل ھەولێرێ کر و لگەل کۆنسولێ ترکیێ «ھاکان کاراچای» دا ھەڤدیتن کر.
سەعدی پیرە ل سەر ناڤەرۆکا وێ ھەڤدیتنێ ل سەر فەیسبۆکا خوە گۆتیە، یەک ژ مژارێن جڤینێ “بھێزکرنا زێدەتر یا پەیوەندیێن ھەر دو ئالیان” بوو.
