پشتی کو چەکدارەکی سەر ب حەشدا شەعبی ل کەرکووکێ ئێریشی ولاتییەکی دکە، د نێڤبەرا میلیشیایێن حەشدا شەعبی دە ئالۆزی دەردکەڤە هۆلێ.
ل گۆر ئاگاهیێن «دارکا مازی»، یەک ژ چەکدارێن حەشدا شەعبی ب ناڤێ «مستەفا راغب» کریستال کو سەر ب میلیشیایێن «سەرایا خوراسانی» یە، د مەها 2 یا ئیسال دا ل کەرکووکێ ب ترۆمبێلا تایبەت ب میلیشیایێن سەرایا خوراسانی ڤە، ل ناڤچەیا ب ناڤێ سوق ئەلهرج، ل نێزی کەرکووکێ ئێریشی سەر ولاتییەکی کرییە و ل وی خستییە و پشتی ئەو ئیشکەنجە کری هەقارەت ل وی کرنە.
چاڤکانیێن مە ئەشکەرە کر، ل دەما ڤێ ئێریشا چەکدارێ حەشدا شەعبی، یەک ژ کەسێن ئامادەبووی ل وێ دەرێ ب رێیا تەلەفۆنا خوە دیمەنێ ئێریشێ تۆمارکرییە و د مەدیایا جڤاکی دە پارڤە کرییە، پشتی پارڤەکرنا ڤێ ڤیدیۆیێ، دەردکەڤە هۆلێ کو کەسێ چەکدار نە ب تەنێ میلیشیایەکی حەشدا شەعبی یە، بەلکو بازرگانەکی مادەیێن هشبەرێ ژی یه.
پشتی پارڤەبوونا ڤیدیۆیێ نوونەرێ میلیشیایێن «سەرایا خوراسانی» داخویانیەکی پارڤە دکە و تێدە دبێژە، ب ت ئاوا ئەڤ چەکدار سەر ب مە ڤە نینە و ئەم وی ناس ناکن! ژ بەر ڤێ یەکێ ل داوییا مەها 2 یا ئیسال ئەڤ کەس ژ بال سازییا ئاساییشا نشتمانی یا ئیراقێ ڤە ل کەرکووکێ، تێ گرتن.
هەر وەها هات هین بوون کو پشتی دەستەسەرکرنا مستەفا راغب، خزمێن مستەفا ب رێیا «محەمەد مەهدی ئەلبەیاتی» بەرپرسێ میلیشیایێن بەدر ل کەرکووکێ هەول داییە پرسگرێکێ چارەسەر بکن، لێ بەلێ، محەمەد مەهدی رازی نەبوویە ئالیکاریا وان بکە و ب وان رە راگهاندیە، مستەفا سەر ب هێزێن «سەرایا خوراسانی» ڤە یە و ت ئەلاقەیا مە ب ڤێ یەکێ ڤە تونەیە، بلا بەرپرسێ “سەرایا خوراسانی” ل وی خوەدی دەرکەڤە و پرسگرێکا وی چارەسەر بکە.
پاش کو خزمێن مستەفا راغب ژ بەرپرسێن میلیشیایێن سەرایا خوراسانی و بەدر بێ هێڤی دبن، ب نەچاری ژ «مەهدی تەقی» پارلامانتەرێ ئیراقێ یێ ئامرلیێ دخوازن ئالیکارییا وان بکن ژ بەر کو مەهدی تەقی و مستەفا راغب ب هەڤرە بازرگانیا مادەیێن هشبەرێ دکن، ئەڤ کەس ب ئه‌ره‌به‌یێن تایبەت یێن میلیشیایێن سەرایا خوراسانی، مادەیێن هشبەرێ ژ ئیرانێ ده‌رباسی ئیراقی دكن.
