مالا ئێزدیان و پەکەکە و راستیا دیوارێ د ناڤبەرا شەنگال و رۆژئاڤایێ کوردستانێ دا

مالا ئێزدیان و پەکەکە و راستیا دیوارێ د ناڤبەرا شەنگال و رۆژئاڤایێ کوردستانێ دا

حکوومەتا ئیراقێ ل سەر سینۆرێ د ناڤبەرا باشوور و رۆژئاڤایێ کوردستانێ یێ ل دەڤەرێن د بن دەستێ خوە دا، دیوارەکێ بەتۆن ئاڤا دکەت. زێرەڤانێن سینۆری دبێژن، کو ئارمانجا وان ئەڤە رێ ل بەر دەرباسبوونا چەکدار و قاچاخچیان بگرن. لێ بەلێ پەکەکە ل دژی ڤی کاری راوەستایە و د مەدیایا خوە دا دەست ب دەرەو و نووچەیێن ساختە ل دژی پەدەکێ کریە و دخوازیت ووسا ب گەل بدەتە باوەرکرن کو ئەڤە کارێ پەدەکێ یە و پەدەکە دخوازیت شەنگالێ ژ رۆژئاڤا ڤەقەتینیت، ل سەر ڤی بنیاتی ژی پەکەکە کەچ و ژن و پیر و کالێن ئێزدیان ژ بۆی خوەپێشاندانێ هان ددەت و وان د بەرژەوەندیا خوە دا بکار تینیت.

پەکەکە دبێژیت، ئیراق ب هەڤکاریا پەدەکێ دخوازیت ب ئاڤاکرنا ڤی دیواری شەنگالێ ژ کانتۆنا جزیرێ ڤەقەتینیت، ئەڤ یەک ژی ناهێتە قەبوولکرن ژ بەر کو دڤێت هاتن و چوونا د نێڤبەرا شەنگال و رۆژئاڤا دا ئازاد بیت. ئەڤ خواستەکا پەکەکێ ژ بۆ خوەشکرنا ژیانا ئێزدیان نینە بەلکو ب تەنێ ژ بۆی ڤێ یەکێ یە کو بکاریت ب ئازادانە د ناڤبەرا شەنگال و رۆژئاڤادا بهێت و بچیت و ب کەیفا دلێ خوە چەکدار و چەکێن خوە ڤەگوهێزیت.

پەکەکێ تەڤ مەدیایا خوە سەفەربەر کریە ووسا بدەن دیار کرن کو ئاڤاکرنا دیواری گرێدایی رێکەفتنا هەولێر-بەغدایێ یە کو د ناڤبەرا حکوومەتا هەرێما کوردستانێ و حکوومەتا ناڤەندی یا ئیراقێ هاتیە ئەنجامدایین، لێ بەلێ راستی ئەڤە کو بریارا ئاڤاکرنا دیواری ژ بۆی سالا 2021ێ ڤەدگەریت دەما «مستەفا کازمی» سەرۆکوەزیرێ ئیراقێ سەرەدانا سینۆرێ د ناڤبەرا شەنگال و رۆژئاڤا کری و ل ور فەرماندەیێن لەشکرێ ئیراقێ داخواز ژ کازمی دکەن ژ بۆی نەهشتنا ڤالاهیا ئەولەهی دیوارەک بەتۆن بهێتە ئاڤاکرن.

د ڤێ دەربارێ دا مالا ئێزدیان، کو سازیەکا ئۆلی یا ئێزدیانە و ل دژی هەبوونا پەکەکێ یە ل شنگالێ داخواز ژ شێنیێن شەنگالێ دکەت ب دەرەوێن پەکەکێ نەیێن خاپاندن و نەبن دارێ د دەستێ پەکەکێ دا وبەشداری خوەپێشاندانێن ل دژی ئاڤاکرنا ڤی دیواری نەبن، ژ بەر کو ئەڤ دیوارە ژ بۆی پاراستنا ئێزدیان دهێتە ئاڤاکرن. مالا ئێزدیان پەکەکێ وەکە مەترسیەکا مەزن ل سەر ئۆلا ئێزدیان دبینیت و دبێژیت، “پەکەکە ب ئایدۆلۆژیا خوە دخوازیت ئۆلا ئێزدیان ژناڤ ببەت، پەکەکە د دەورەیێن پەروەردەیێ دا دخوازیت گەنجێن ئێزدی ووسا پەروەردە بکەت کو ئایدۆلۆژیا ئۆجالان وەرگرن و دەست ژ نرخێن خوە یێن ئۆلی بەردەن”.

مالا ئێزدیان، ب ئاوایەکێ ئاشکەرا ل شەنگالێ ل دژی پەکەکێ دسەکنیت و هندەک خوەپێشاندان ل دژی هەبوونا چەکدارێن پەکەکێ د ناڤا شەنگالێ دا ئەنجام دایینە، مالا ئێزدیان پەکەکێ ب ڤێ یەکێ ژی تاوانبار دکەت کو رێ نادەت گەلێ ئێزدی ب ئاوایەک ئازاد هاتن و چوونێ ژ بۆی چیایێ شەنگالێ بکەن، هەر وەها ل سەر رەڤاندنا زارۆکان و چەکدارکرنا وان و بکارئانینا وان  ژ بۆی بەرژەوەندیێن پەکەکێ، ب ئاوایەک هەری توند پەکەکێ رەخنە دکەت.

سازیا ئۆلی یا مالا ئێزدیان، داخوازێ ژ ئێزدیان دکەت ل دژی پەکەکێ بسەکنن و ل پەی بانگەوازیێن وێ یێن درەو نەچن، ژ بەر کو ئەو پەکەکێ ب دژمنا سەرەکی یا ئۆلا ئێزدیان دزانن، ئەڤ سازیا ئێزدیان دبێژیت، پەکەکە دێ ب کار و کریارێن خوە فەرمانەکا دن ب سەرێ گەلێ ئێزدی ئینیت و چیایێ شەنگالێ کو وەک سەمبۆلەک ئێزدیان تێ ناسکرن کەتە جیهێ شەرەکێ کو ئێزدیان هیچ پێوەندیەک پێڤە نینە، کۆلاندنا تونەل و شکەفتان ل چیایێ شەنگالێ و قەدەغەکرنا چوون و هاتنا ئێزدیان بۆ چیای ب باشترین بەلگە ددەن زانین.

ژ ئالیێ دن، پەکەکێ ژی تەڤ هەول دانە کو کەسێن مالا ئێزدیان ب رێڤە دبەن بکریت و وان بێدەنگ بکەت و د بەرژەوەندیا خوە دا وان بدەتە کارکرن. پەکەکێ هەول دایە ئەندامێن مالا ئێزدیان ژی وەکە وان کەسێن کو چ پلەیا وان یا عەشیرەتی و ئۆلی نینە لێ وەکە شێخ و سەرۆک عەشیر دایینە ناساندن ب پارەیان د بەرژەوەندا خوە دا بکار بینیت، لێ هەیا نها هیچ یەک ژ ئەندامێن مالا ئێزدیان خوە نەفرۆتیە پەکەکێ و ل همبەر پەکەکێ ل بەر خوە ددەن، ئەڤ یەک ژی بوویە سەدەما نەرەحەتیا پەکەکێ ل شەنگالێ.

 

پوستێن ھەمان بەش