وەزیرێ نەفتا ئیراقێ راگەھاند، پرانیا گرێبەستێن نەفتێ یێن حکوومەتا ھەرێما کوردستانێ بێ پرسگرێکن.
وەزیرێ نەفتا ئیراقێ «ئێحسان عەبدولجەبار» د ھەڤپەیڤینەکێ دا ل گەل کانالا «ئەل فرات» یا ئیراقێ دا راگەھاند: وەزارەتا وان ل گۆر دەستووری دانووستانێ ل گەل نەفتا کوردستانێ و حکوومەتا ھەرێما کوردستانێ دکەت.
ئێحسان عەبدولجەبار پێویست زانی کو ئالیێن سیاسی ژ پرسگرێکا نەفتێ دوور بکەڤن و گۆت: نەفت ئاموور و تشتەکێ سیاسییە. لێ ب سیاسەتێ نایێ رێڤەبرن و دڤێت ژ سیاسەتێ بهێتە دوورخستن.
وەزیرێ نەفتا ئیراقێ داخوازێن حکوومەتا خوەیا دەربارێ نەفتا کوردستانێ دا ئاشکەرا کرن و راگەھاند: ئەو داخواز ب رێڤەبەریا سیاسی یا کوردستانێ و شاندەیا حکوومەتا ھەرێما کوردستانێ ھاتنە گەھاندن.
داخواز وەھا نە:
– گرێبەستێن نەفتێ یێن کوردستانێ ل بەرچاڤ بهێنە دەرباس کرن و ل گۆر یاسایێ د بەرژەوەندیا ھەردو ئالیان دا سەرەراست کرن.
– ئاڤاکرنا کۆمپانیەکا نەفتێ یا کوردستانێ کو کۆمپانیا دەولەتا فەدەرال یا ئراقێ بیت. ئەو کۆمپانی بنکەیا وێ یا سەرەکی ل ھەولێرێ بیت و ئالیێ یەکەم دبیت د پەیمانێن ل گەل کۆمپانیێن نەفتێ یێن ژ بۆ کار کرنا ل سەر سەکتۆرا نەفت و گازا کوردستانێ.
پێشخستن و دانانا نرخان د دەستھلاتا حکوومەتا فەدەرالا ئیراقێ دا بیت، لێ ب ھەڤبەشیا ل گەل حکوومەتا ھەرێما کوردستانێ.
ئێحسان عەبدولجەبار دەربارێ ھەلوێستێ ھەرێما کوردستانێ ژ بۆ داخوازێن حکوومەتا ئیراقێ دا ژی راگەھاند: د راستیێ دا بەرپرسێن ھەرێما کوردستانێ ژ بەر نەبوونا باوەریا وان یا ب دەستھلاتداریا بەغدایێ، ھندەک خوە دوورگرتن و نیگەرانی ل گەل وان چێبوویە.
وەزیرێ نەفتا ئیراقێ دیار کر، حکوومەتا وان چ پرسگرێک ل گەل سەدێ 80 یا گرێبەستێن نەفتێ یێن ھەرێما کوردستانێ نینە. ژ بەر کو بێ پرسگرێکن، لێ ئەم دخوازین تەنێ ل سەر پرسگرێکێن سەدێ 20 یێن هەیی دانووستاندنێ ل گەل وان بکەین.
بەری ناھا سەرۆکێ فەرمانگەھا ھەماھەنگی و دووڤچوون و ئەندامێ شاندەیا دانووستانکارا حکوومەتا ھەرێما کوردستانێ «عەبدولحەکیم خەسرەو» راگەھاندبوو: “بەغدایێ ھندەک پێشنەیار ژ بۆ چارەسەر کرنا دۆسیا نەفتا ھەرێمێ ھەبوون، کو کۆمپانیەک ژ بۆ فرۆتنا نەفتێ ل ھەرێما کوردستانێ بهێتە دامەزراندن و مولکێ بەغدا بیت. ل ھەمبەر وێ ھەرێما کوردستانێ ژی ئەو پێشنەیار ھەبوو کو ھەرێما کوردستانێ بخوە کۆمپانیەکێ دامەزرینیت، ببیتە مولکێ خەلکێ ھەرێما کوردستانێ، کو تەمامێ پابەندی د چارچۆڤەیا وێ کۆمپانیێ دا بێن رێخستن کرن.”
در. عەبدولحەکیم خەسرەو گۆت: “داخواز و پێشنەیارێن بەغدایێ یێن دەربارێ دامەزراندنا کۆمپانیەکێ ل ھەرێما کوردستانێ کو مولکێ وان بیت ھاتە رەد کرن. مە بۆ وان رۆن کر کو ھەرێما کوردستانێ د چارچۆڤەیا مادەیا 112 یا دەستووری و ل گۆر خالێن 2 نەفتێ دفرۆشیت.”
